الماتى قالاسى اكىمىنىڭ ورىنباسارى ابزال نۇكەنوۆ ءال-فارابي اتىنداعى قازاق ۇلتتىق ۋنيۆەرسيتەتىندە بارىپ، جوو-نىڭ قازىرگى عىلىمي ازىرلەمەلەرىمەن، ينفراقۇرىلىمىمەن جانە يننوۆاسيالىق مۇمكىندىكتەرىمەن تانىستى.
قالا اكىمىنىڭ ورىنباسارى جوعارى تەحنولوگيالىق جوبالار مەن يننوۆاسيالىق ازىرلەمەلەر ۇسىناتىن Farabi Hub يننوۆاسيالىق ورتالىعىندا بولدى. بۇگىندە حاب ءىرى ينۆەستيسيالىق كومپانيالارمەن، عىلىمي-زەرتتەۋ ينستيتۋتتارىمەن جانە جەتەكشى شەتەلدىك ۋنيۆەرسيتەتتەرمەن تىعىز ارىپتەستىك ورناتقان. زاماناۋي قۇرىلعىلارمەن جابدىقتالعان زەرتحانالاردا ءتۇرلى باعىت بويىنشا عىلىمي زەرتتەۋلەر جۇرگىزىلىپ، جاڭا تەحنولوگيالار ازىرلەنىپ جاتىر. ورتالىقتىڭ نەگىزگى ماقساتى – قازۇۋ عالىمدارىنىڭ عىلىمي يدەيالارى مەن جوبالارىن ەكونوميكاعا ەنگىزۋدى جەدەلدەتۋ جانە يننوۆاسيالاردى كوممەرسيالاندىرۋ ۇدەرىسىن كۇشەيتۋ.
بۇدان كەيىن ابزال نۇكەنوۆ وندىرىستىك روبوتوتەحنيكا جانە ينجەنەرلىك قۇزىرەتتەر ورتالىعىندا بولدى. مۇندا نەمىستىڭ جوعارى ساپالى KUKA روبوتتارى ورناتىلعان. قازۇۋ روبوتوتەحنيكانى جۇيەلى دامىتىپ، بۇل سالادا ەلىمىزدەگى جەتەكشى عىلىمي ورتالىقتاردىڭ بىرىنە اينالىپ كەلەدى. ۋنيۆەرسيتەت ماماندارى زياتكەرلىك جۇيەلەر، ۇشقىشسىز ۇشۋ اپپاراتتارى جانە اۆتوماتتاندىرىلعان وندىرىستىك شەشىمدەر باعىتىندا زەرتتەۋ جۇرگىزىپ وتىر.
اكىمنىڭ ورىنباسارى حالىقارالىق دەڭگەيدە جۇمىس ىستەيتىن «سيفرلىق تەحنولوگيالار جانە روبوتوتەحنيكا» ينستيتۋتىنىڭ جانە روبوتوتەحنيكا ورتالىعىنىڭ قىزمەتىمەن دە تانىستى. 600 شارشى مەتر اۋماقتا زاماناۋي وندىرىستىك تەحنولوگيالار مەن جاساندى ينتەللەكت نەگىزىندە قۇرىلعان بەس يننوۆاسيالىق پلاتفورما جۇمىس ىستەيدى. مۇندا ستۋدەنتتەر سيفرلىق ءوندىرىس ۇدەرىستەرىن، كۇردەلى اۆتوماتتاندىرىلعان جۇيەلەردى مەڭگەرىپ، وزىق تەحنولوگيالار سالاسىندا تاجىريبەلىك داعدىلاردى مەڭگەرەدى.
جوو-نىن ارالاعان نۇكەنوۆ ۋنيۆەرسيتەت بازاسىندا ورناتىلعان سۋپەركومپيۋتەردىڭ جۇمىسىمەن تانىستى. ورتالىق ازياداعى ەڭ قۋاتتى ەسەپتەۋ جۇيەلەرىنىڭ ءبىرى سانالاتىن بۇل سۋپەركومپيۋتەر ەلىمىزدىڭ عىلىمي ينفراقۇرىلىمىن كۇشەيتىپ، ءىت جانە جاساندى ينتەللەكت سالاسىنداعى مامانداردى دايارلاۋعا جاڭا مۇمكىندىكتەر اشادى. ونىڭ ەسەپتەۋ قۋاتى 2000 تەرافلوپس، ال ارحيتەكتۋراسى 400-دەن استام Intel Xeon 6330N سەرۆەرلىك پروسەسسورلارىنان تۇرادى.
سونىمەن قاتار، ابزال نۇكەنوۆ گەوگرافيا جانە تابيعاتتى پايدالانۋ فاكۋلتەتىنە بارىپ، قازۇۋ عالىمدارىنىڭ تابيعاتتى قورعاۋ، توپىراق قۇنارلىلىعىن ارتتىرۋ، قۇرعاقشىلىقتىڭ الدىن الۋ جانە سۋ ساپاسىن جاقسارتۋعا باعىتتالعان عىلىمي جوبالارىمەن تانىستى.
قالا اكىمىنىڭ ورىنباسارى ۋنيۆەرسيتەتتىڭ تەحنيكالىق بازاسىنىڭ جوعارى دەڭگەيىن اتاپ، الماتى جاستارىنا ساپالى ءبىلىم بەرۋدە زاماناۋي عىلىمي ورتا قالىپتاستىرۋدىڭ ماڭىزدىلىعىنا توقتالدى. ول ۋنيۆەرسيتەت ۇجىمىنا عىلىمي جانە يننوۆاسيالىق جوبالاردى جۇزەگە اسىرۋدا تابىس تىلەپ، قالا اكىمدىگى ءبىلىم، عىلىم جانە بىلىكتى مامان دايارلاۋ باعىتىنداعى ىنتىماقتاستىقتى ءارى قاراي نىعايتۋعا مۇددەلى ەكەنىن جەتكىزدى.