الماتىدا پوليسيا مەن جەكەمەنشىك كۇزەت ۇيىمدارى ازاماتتاردىڭ قاۋىپسىزدىگىن قامتاماسىز ەتۋ باعىتىندا ىنتىماقتاستىقتى كۇشەيتۋدە.
الماتى قالالىق پوليسيا دەپارتامەنتىندە قالاداعى جەكەمەنشىك كۇزەت ۇيىمدارىنىڭ باسشىلارىمەن كەزدەسۋ ءوتتى. كەڭەسكە پوليسيانىڭ ءتيىستى بولىمشەلەرىنىڭ وكىلدەرى مەن كۇزەت ۇيىمدارىنىڭ باسشىلارى قاتىستى، - دەپ حابارلايدى Aqshamnews.kz.
كەزدەسۋ بارىسىندا ىشكى ىستەر ورگاندارى مەن جەكەمەنشىك كۇزەت ۇيىمدارىنىڭ ءوزارا ءىس-قيمىلىن نىعايتۋ، كۇزەت قىزمەتتەرىنىڭ ساپاسىن ارتتىرۋ جانە ادامدار كوپ جينالاتىن، سونداي-اق بالالار بولاتىن نىساندارداعى قاۋىپسىزدىكتى قامتاماسىز ەتۋ ماسەلەلەرى تالقىلاندى. اسىرەسە مەكتەپتەرگە، بالاباقشالارعا، كوللەدجدەرگە، جوعارى وقۋ ورىندارىنا، دەنساۋلىق ساقتاۋ مەكەمەلەرىنە، ساۋدا-ويىن-ساۋىق ورتالىقتارىنا، بازارلارعا جانە جاپپاي دەمالىس ورىندارىنا ەرەكشە نازار اۋدارىلدى.
- بالالار مەن ازاماتتاردىڭ كوپ جينالاتىن نىساندارداعى قاۋىپسىزدىگى – باسىم مىندەتتەردىڭ ءبىرى. ءقاۋىپ تونگەن جاعدايدا كۇزەتشىلەردىڭ كاسىبيلىگى مەن جەدەل ارەكەت ەتۋگە دايىندىعى ءقاۋىپتىڭ الدىن الۋعا جانە دەر كەزىندە ارەكەت ەتۋگە تىكەلەي اسەر ەتەدى. ءقازىر ءبىز كۇزەتشىلەردى دايارلاۋ تالاپتارىن كۇشەيتىپ، تەرروريزمگە وسال نىساندارداعى جۇمىس ساپاسىنا قويىلاتىن جاۋاپكەرشىلىكتى ارتتىرىپ جاتىرمىز. پوليسيا مەن كۇزەت ۇيىمدارىنىڭ بىرلەسكەن جۇمىسى عانا ازاماتتارىمىزدىڭ ناقتى قاۋىپسىزدىگىن قامتاماسىز ەتە الادى، – دەدى الماتى قالاسى پد كۇزەت قىزمەتىن باقىلاۋ ءبولىمىنىڭ باستىعى باحتيار تەمىربەكوۆ.
كەزدەسۋ بارىسىندا كۇزەت ۇيىمدارىنىڭ باسشىلارىنا كۇزەت سالاسىنداعى زاڭناما تالاپتارى ەسكەرتىلىپ، ءبىلىم بەرۋ جانە دەنساۋلىق ساقتاۋ نىساندارىندا جۇمىس ىستەيتىن كۇزەتشىلەردىڭ جاس شەگىن تومەندەتۋ، سونداي-اق قىزمەتكەرلەردىڭ بىلىكتىلىگىن ۇنەمى ارتتىرىپ وتىرۋ قاجەتتىگى تالقىلاندى. كەزدەسۋ قورىتىندىسى بويىنشا الماتى قالاسىندا سەنىمدى قاۋىپسىزدىك جۇيەسىن قۇرۋ ماقساتىندا پوليسيا مەن كۇزەت قۇرىلىمدارىنىڭ ءوزارا ىنتىماقتاستىعىن ودان ءارى دامىتۋ تۋرالى كەلىسىمگە قول جەتكىزىلدى.