ەل پرەزيدەنتى قاسىم-جومارت توقايەۆتىڭ قازاقستان حالقىنا جولداۋى ەلىمىزدىڭ ەكونوميكالىق جانە الەۋمەتتىك-مادەني دامۋىنىڭ جاڭا پاراديگماسىن جۇزەگە اسىرۋعا باعىتتالعان. جولداۋدىڭ ەرەجەلەرى مەن قورىتىندىلارى – حالىقتىڭ ءال-اۋقاتىن ارتتىرۋعا ارنالعان باعدارلامالىق قۇجات. سوندىقتان، ءبىز، بۇكىل قازاقستان حالقى، مەملەكەت باسشىسىنىڭ تىڭ يدەيالارى مەن باستامالارىن قولداۋدىڭ ءتيىمدى شارالارىن قابىلداۋعا ءتيىسپىز.
جولداۋداعى ماڭىزدى ماسەلەلەردىڭ ءبىرى – رەسپۋبليكادا اەس سالۋعا قاتىستى رەفەرەندۋم وتكىزۋ شاراسى.
اەس سالىنۋى ەل ەكونوميكاسىنىڭ دامۋىنا سەپتىگىن تيگىزەدى. قازىرگى تاڭدا دۇنيە جۇزىندەگى 50-دەن استام مەملەكەت اەس-تى پايدالانۋدا، 400-دەن استام يادرولىق رەاكتور دۇنيە جۇزىندەگى ەنەرگيانىڭ توعىز پايىزىن وندىرەدى، 16 ەلدە 60-قا جۋىق جاڭا رەاكتور سالىنۋدا.
اەس قۇرىلىسى ەنەرگەتيكالىق جانە ەكولوگيالىق ماسەلەلەردى شەشىپ قانا قويماي، عىلىمدى دامىتۋعا، سونداي-اق جاڭا تەحنولوگيالار مەن ءبىلىم بەرۋ باعدارلامالارىن ەنگىزۋگە مۇمكىندىك اشادى. يادرولىق ەنەرگەتيكانى زەرتتەۋشىلەر اتوم ەنەرگياسىن تۇتىنۋدىڭ جىل سايىن 3 پايىزعا ارتىپ وتىرعانىن اتاپ ءوتتى. سونىمەن قاتار، ونەركاسىپتىڭ، قۇرىلىستىڭ، كولىكتىڭ جانە ەل ەكونوميكاسىنىڭ باسقا دا سالالارىنىڭ بەلسەندى دامۋىنا بايلانىستى رەسپۋبليكادا ەنەرگيا كوزدەرىنىڭ ۇلكەن تاپشىلىعى كۇتىلۋدە. ەلىمىزدەگى ەنەرگيانىڭ 70 پايىزى كومىر ستانسيالارىنان الىناتىنىن ەسكەرسەك، بۇل باستاما اسا قاجەتتى شارا. بۇل – دامۋىمىزدىڭ كوكجيەگىن كەڭەيتەتىن، قورشاعان ورتانىڭ تازالىعى مەن ەنەرگيا تاپشىلىعى ماسەلەسىن شەشۋدىڭ ءتيىمدى جولدارىنىڭ ءبىرى.
حالقىمىزدا «شەگىرتكەدەن قورىققان ەگىن ەكپەيدى» دەگەن ناقىل ءسوز بار. بۇل تۇسىنىك بۇگىنگى تاڭدا وزەكتى بولىپ وتىر. سونىمەن قاتار، زاماناۋي وزىق رەاكتورلاردا قاۋىپسىزدىك تالاپتارى بەلگىلەنگەندىكتەن، جاڭا بۋىن رەاكتورلارى بىرەگەي بەلسەندى قاۋىپسىزدىك جۇيەلەرىمەن جابدىقتالعان.
ساراپشىلاردىڭ پىكىرىنشە، 2050 جىلعا قاراي اەس ارقىلى ەلەكتر ەنەرگياسىن ءوندىرۋ ەكى ەسەگە ارتادى. وسىعان بايلانىستى، يادرولىق قاۋىپسىزدىكتى قامتاماسىز ەتۋ جاھاندىق ماسەلەگە اينالىپ وتىر.
وسى ورايدا ەل پرەزيدەنتى قازاقستان حالقىنا جولداۋىندا: «بىزگە رەفەرەندۋم ارقىلى ماڭىزدى ستراتەگيالىق ماسەلەلەر بويىنشا تۇپكىلىكتى شەشىم قابىلداۋ قاجەت. اەس سالۋ نەمەسە سالماۋ ماسەلەسى ەلىمىزدىڭ بولاشاعى ءۇشىن وتە ماڭىزدى. سوندىقتان، بۇل ماسەلەنى جالپىحالىقتىق رەفەرەندۋم ارقىلى شەشكەن دۇرىس دەپ ەسەپتەيمىن»، – دەدى.
جوعارىدا ايتىلعانداردى نەگىزگە الا وتىرىپ، الماتى قالالىق ارداگەرلەر كەڭەسىنىڭ ءتورالقاسى الماتىلىقتاردى الداعى رەفەرەندۋمعا بەلسەنە قاتىسۋعا جانە ەلىمىزدىڭ بولاشاعى ءۇشىن قازاقستاندا اتوم ەلەكتر ستانسياسىن سالۋ جونىندەگى وسى تاعدىرشەشتى باستامانى قولداۋعا شاقىرادى.
الماتى قالالىق ارداگەرلەر كەڭەسىنىڭ ءتورالقاسى