وقۋ-اعارتۋ مينيسترلىگى بۇل باعىتتا قولداۋ شارالارىن پىسىقتاپ جاتىر. سونىمەن قاتار قاراجاتتى بىردەن بوبەكجايلارعا ەمەس، ءار بالانىڭ دەربەس شوتىنا اۋدارۋ بويىنشا پيلوتتىق جوبا ەنگىزىلدى.
ەلدە 11 600-دەن استام مەكتەپكە دەيىنگى ءبىلىم بەرۋ ۇيىمى بار. ونىڭ جارتىسىنان كوبى – جەكە مەكەمەلەر. اكىمشىلىك اۋماق پەن ەكولوگيالىق جاعدايعا قاراي بوبەكجايلارعا مەملەكەت ەسەبىنەن ءار بالا ءۇشىن 53 مىڭنان 62 مىڭ تەڭگەگە دەيىن اۋدارىلادى. ال اتا-انالار ءوڭىر اكىمدەرى بەكىتكەن الەۋمەتتىك ازىق-تۇلىك جيىنتىعىنىڭ اقىسىن تولەپ ءجۇر. بۇدان بىلاي مەكتەپكە دەيىنگى ۇيىمداردى قارجىلاندىرۋ تەتىگى تۇبەگەيلى وزگەرەدى. پرەزيدەنت جولداۋىندا جۇكتەلگەن جاڭا مىندەتتەردىڭ ءبىرى – وسى.
"الەۋمەتتىك وسال توپقا جاتاتىن وتباسىلاردىڭ بالالارى تەگىن تاماقپەن قامتىلعان. بۇگىنگى تاڭدا ءبىلىم بەرۋ ۇيىمدارىندا 97 مىڭنان استام وسىنداي بالا تەگىن تاماقپەن قامتاماسىز ەتىلگەن. ەندى وسىنىڭ جالعاسى رەتىندە ءارى قاراي كومەك قاجەت ەتەتىن وتباسىلار مەملەكەتتەن كوبىرەك قولداۋ كورەتىندەي مەحانيزممەن قايتا قاراستىرۋ ۇسىنىلعان. سوندىقتان ءقازىر وسى جۇمىستار باستالىپ تا كەتتى"، - دەيدى ق ر وقۋ-اعارتۋ مينيسترلىگى مەكتەپكە دەيىنگى ءبىلىم بەرۋ دەپارتامەنتىنىڭ ديرەكتورى مانارا اداموۆا.
سونداي-اق تاراز قالاسىندا دەربەستەندىرىلگەن قارجىلاندىرۋ ءادىسى سىنالىپ جاتىر. پيلوتتىق جوبا بويىنشا مەملەكەت ەسەبىنەن بەرىلەتىن تولەم بوبەكجايلارعا ەمەس، ءار بالانىڭ شوتىنا اۋدارىلادى.
"ءار بالانىڭ اتا-اناسىنىڭ بالاباقشانى تاڭداۋ مۇمكىندىگىنىڭ بولۋى، بىرىنشىدەن. ەكىنشى – قاراجاتتى بالانىڭ ەسەپشوتىنا اۋدارۋ. ياعني اتا-انا ەكىنشى دەڭگەيلى بانكتەن ەسەپشوت اشادى. سول جەردەن بالانىڭ اتىنا قاراجات تۇسەدى. ول قاراجاتتى ەشكىم پايدالانا المايدى، ەشقايدا جۇمساي المايدى. تەك قانا تاڭداعان بالاباقشاعا اۋدارۋ مۇمكىن. ياعني ماقساتتى تۇردە جۇمسالادى"، - دەدى ق ر وقۋ-اعارتۋ مينيسترلىگى مەكتەپكە دەيىنگى ءبىلىم بەرۋ دەپارتامەنتىنىڭ ديرەكتورى.
پيلوتتىق جوبا جىل سوڭىنا دەيىن شىمكەنت، تۇركىستان قالالارىندا دا ەنگىزىلەدى. وڭ ناتيجە بەرسە، ەل بويىنشا جۇزەگە اسىرۋ جوسپارلانىپ وتىر.