الماتى پروكۋرورلارى الەۋمەتتىك جەلىدە اككاۋنت اشقان
الماتىدا زاماناۋي تەحنولوگيالاردى پايدالاناتىن تەلەفون الاياقتارى كوبەيىپ كەلەدى، دەپ حابارلايدى Almaty-akshamy.kz الماتى قالاسىنىڭ پروكۋراتۋراسىنا سىلتەمە جاساپ.
قالالىق پروكۋراتۋرانىڭ مالىمەتىنشە، الاياقتار وزدەرىن ءتارتىپ ساقشىسى دەپ تانىستىرىپ، ازاماتتارعا تەلەفون سوعىپ، ولارعا بانك شوتتارىنىڭ بۇزىلعانىن نەمەسە اتىنا نەسيە رەسىمدەۋ ارەكەتى جاسالعانىن حابارلايدى.
«مۇنداي ارەكەتتەردى جويۋ ءۇشىن ولار ءتيىستى الگوريتم ۇسىنادى. الاياقتاردىڭ ايتۋىنشا، شوت يەلەرىنە ارنايى قاۋىپسىزدىك كودى جىبەرىلەدى، ولار سونى بىزگە ايت دەپ تالاپ ەتەدى. بۇل رەتتە ابونەنتتەردىڭ ۇيالى تەلەفوندارىندا ارنايى قۇرالداردىڭ كومەگىمەن قۇقىق قورعاۋ ورگاندارىنىڭ نومىرلەرى انىقتالۋى مۇمكىن. وسىنى پايدالانعان قىلمىسكەرلەر ءوز سوزدەرىنىڭ راستىعىن دالەلدەۋ ءۇشىن قۇقىق قورعاۋ ورگاندارىنىڭ رەسمي سايتتارىندا اقپاراتتى (قىزمەتكەرلەردىڭ ءاتى-جونى، نومىرلەرى) تەكسەرۋدى ۇسىنادى. وسىعان سەنگەن ادامدار الاياقتاردىڭ قۇربانى بولۋى مۇمكىن. جوعارىدا ايتىلعان اقپاراتتى ەسكەرە وتىرىپ، پروكۋراتۋرا قىراعى بولۋدى جانە اتالعان قىلمىستىق ارەكەتتەرگە بوي الدىرماۋدى سۇرايدى. ءوز كەزەگىندە قۇقىق قورعاۋ ورگاندارى قىلمىسكەرلەردى انىقتاۋ جانە ۇستاۋ شارالارىن جۇرگىزۋدە»، - دەلىنگەن پروكۋراتۋرانىڭ حابارلاماسىندا.
سونداي-اق، الماتى پروكۋرورلارى الەۋمەتتىك جەلىدە اككاۋنت اشقان.
«حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ شەڭبەرىندە Facebook الەۋمەتتىك جەلىسىندە ازاماتتاردىڭ پروبلەمالارى مەن شاعىمدارىنا ۋاقتىلى دەن قويۋ، حالىقپەن كەرى بايلانىستى جەدەل قامتاماسىز ەتۋ ءۇشىن الماتى قالاسى اۋداندارىنىڭ بارلىق پروكۋرورلارى مەن قالانىڭ تابيعات قورعاۋ پروكۋرورىنىڭ اككاۋنتتارى اشىلدى. ازاماتتار قاجەتتى قۇقىقتىق سۇراقتار، اۋداننىڭ پروبلەمالىق ماسەلەلەرى بويىنشا جۇگىنىپ، تۇسىندىرمە اقپارات الا الادى»، - دەپ حابارلادى پروكۋراتۋرا.