بيىل سۋ ۇنەمدەۋ تەحنولوگيالارى بار ەگىس القاپتارى 300 مىڭ گەكتارعا دەيىن جەتكىزىلەدى. بۇل تۋرالى ماجىلىستە ءوتىپ جاتقان ۇكىمەت ساعاتىندا اۋىل شارۋاشىلىعى ءمينيسترى ەربول قاراشوكەيەۆ ايتتى، دەپ حابارلايدى Almaty-akshamy.kz.
«كوكونىسكە قاتىستى جالپى ءونىمىن ارتتىرۋدىڭ نەگىزگى فاكتورلارىنىڭ ءبىرى - سۋارمالى جەرلەردى اينالىمعا ەنگىزۋ. بۇل جۇمىس ەكولوگيا، گەولوگيا جانە تابيعي رەسۋرستار مينيسترلىگىمەن بىرلەسىپ جۇرگىزىلەدى. قازىرگى كەزدە سۋ ۇنەمدەۋ تەحنولوگيالارى ەنگىزىلگەن اۋداندار كوبەيىپ كەلەدى. بۇل ءوز كەزەگىندە سۋ مەن قورەكتىك زاتتاردى ناقتى بەرۋ ارقىلى ونىمدىلىكتى ارتتىرۋعا ىقپال ەتەدى. جىل سايىنعى وسىمگە ينۆەستيسيالىق سۋبسيديالاۋ ىقپال ەتىپ وتىر، ونىڭ اياسىندا فەرمەرلەردىڭ قازىرگى زامانعى سۋارۋ جۇيەلەرىن ساتىپ الۋعا، سونداي-اق سۋ الۋ جانە بەرۋ ءۇشىن بارلىق قاجەت ينفراقۇرىلىمدى جۇرگىزۋگە جۇمساعان شىعىندارىنىڭ 50 پايىزى وتەلىپ جاتىر»، - دەدى ە. قاراشوكەيەۆ.
ونىڭ ايتۋىنشا، 2022 جىلى سۋ ۇنەمدەۋ تەحنولوگيالارى قولدانىلاتىن جەرلەر 21 مىڭ گەكتارعا ءوستى، دەپ جازدى قازاقپارات.
«بيىل سۋ ۇنەمدەۋ تەحنولوگيالارى بار مۇنداي جەرلەردىڭ اۋماعىن 300 مىڭ گەكتارعا دەيىن جەتكىزۋ ەسكەرىلگەن، ال 2030 جىلعا قاراي سۋارمالى القاپتار 750 مىڭ گەكتارعا دەيىن جەتكىزىلەدى»، - دەدى مينيستر.