الماتى قالالىق پوليسيا دەپارتامەنتى مالىمەتىنشە، جول-كولىك وقيعاسىن تەرگەۋ بارىسىندا قىزمەتكەرلەر ۆەلوسيپەدشى قىزدى قاعىپ كەتتى دەلىنگەن Toyota Solaris اۆتوكولىگىنىڭ جۇرگىزۋشىسىن تاپقان.
ول وقيعا ورنىنا پوليسيا قىزمەتكەرلەرى مەن دارىگەرلەر كەلگەنىن ايتتى.
كولىكتىڭ جۇرگىزۋشىسى دوستىق داڭعىلىمەن وڭتۇستىككە قاراي كەلە جاتىپ، كەرى بۇرىلعان.
سول كەزدە سولتۇستىككە قاراي كەلە جاتقان ۆەلوسيپەدشى كولىككە سوعىلماۋ ءۇشىن تەجەگىشتى باسىپ، قۇلاپ قالعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
وسى ءساتتى باقىلاۋ كامەراسىنىڭ بەينەجازباسىنان انىق كورۋگە بولادى.
«بۇرىلىپ ۇلگەرگەن كولىك يەسى ارتقى اينادان قىزدىڭ قۇلاپ قالعانىن كورەدى. بۇل جەردە توقتاۋعا تىيىم سالىنعاندىقتان باسقا كوشەگە كولىگىن قالدىرىپ، وقيعا ورنىنا جاياۋ بارعان. ول بىردەن 102، 103 نومىرلەرىنە حابارلاعان. پوليسيانىڭ كەلگەنىن كۇتتى. پوليسەيلەر ۆەلوسيپەد پەن اۆتوكولىك اراسىندا ەشقانداي قاقتىعىس بولماعانىن انىقتادى. سول سەبەپتى جول اپاتى تىركەلمەدى. دارىگەرلەر قىزدى اۋرۋحاناعا الىپ كەتتى. ءقازىر قىزدى وتا جاساۋعا دايىنداپ جاتىر، سەبەبى، ونىڭ تىستەرى سىنعان، جاق سۇيەگى جاراقاتتانعان»، - دەپ حابارلادى پوليسيانىڭ باسپا ءسوز قىزمەتى.
سونداي-اق ۆەدومستۆو كوشەدە تۇرعان پوليسيا كولىگىنىڭ وقيعاعا ەش قاتىسى جوق ەكەنىن حابارلادى.
ءتارتىپ ساقشىلارى اقپاراتتى جان-جاقتى تەكسەرگەن سوڭ عانا قورىتىندى شىعارۋعا، ال ب ا ق وكىلدەرىن جالعان اقپارات تاراتپاۋعا شاقىرادى.
ەسكە سالايىق، كەشە الەۋمەتتىك جەلىدە كولىك قاققان قىزدىڭ ۆيدەوسى شىقتى.