باس پروكۋراتۋرادا ۇلتتىق قاۋىپسىزدىك كوميتەتى، سىبايلاس جەمقورلىققا قارسى ءىس-قيمىل، قارجىلىق مونيتورينگ، ىشكى ىستەر مينيسترلىگىنىڭ اۋماقتىق قىلمىستىق قۋدالاۋ ورگاندارى مەن پروكۋراتۋرا باسشىلارىنىڭ قاتىسۋىمەن كۇدىكتى ادامداردى ىزدەستىرۋدىڭ تيىمدىلىگىن ارتتىرۋ ماسەلەلەرى قارالدى.
قۇقىق قورعاۋ ورگاندارىنىڭ بىرلەسكەن جۇمىسىنىڭ ناتيجەسىندە كەيىنگى 3 جىلدا ىزدەۋدەگى تۇلعالاردىڭ سانى 5 مىڭنان 2،5 مىڭعا دەيىن، ياعني ەكى ەسەگە تومەندەگەنى اتاپ ءوتىلدى، -دەپ حابارلايدى اlmaty-akshamy.kz ق ر باس پروكۋراتۋراسىنىڭ باسپا ءسوز قىزمەتىنە سىلتەمە جاساپ.
بۇگىنگى تاڭدا 284 ادام اسا اۋىر، 1553 ادام اۋىر، 574 ادام ورتاشا جانە ونشا اۋىر ەمەس قىلمىس جاساعانى ءۇشىن ىزدەستىرىلۋدە.
2023 جىلدىڭ باسىنان بەرى ىزدەستىرۋگە جاريالانعان 684 ادامنىڭ 473ء-ى ۇستالدى، بۇل 70% قۇرايدى.
رەسەي، اقش، تۇركيا، ءباا، قىرعىزستان، وزبەكستان جانە ۋكراينادان بۇگىنگى تاڭدا ەلگە 95 ازامات قايتارىلدى.
بۇل قىلمىستىق قۋدالاۋ ورگاندارىنىڭ ۇيلەستىرىلگەن قىزمەتى، ىزدەستىرۋ دەرەكقورلارىنىڭ كۇندەلىكتى مونيتورينگىن ۇيىمداستىرۋ جانە پروكۋرورلىق تەكسەرۋلەردى جۇرگىزۋ، سونداي-اق حالىقارالىق ارىپتەستەرمەن تىعىز ءوزارا ءىس-قيمىل ناتيجەسىندە مۇمكىن بولدى.
ۇيىمدىق جانە قۇقىقتىق شارالار كەشەنىنەن باسقا، قىلمىسكەرلەردى ۇستاۋ ءۇشىن سيفرلىق تەحنولوگيالار بەلسەندى تۇردە ەنگىزىلۋدە. بەت-الپەتتى تانۋدىڭ وتاندىق الگوريتمى جاسالدى، ونىڭ كومەگىمەن 20-دان استام كۇدىكتى انىقتالدى.
2022 جىلدان باستاپ ىزدەستىرۋ جۇمىسىنىڭ تيىمدىلىگىن ارتتىرۋدى قامتاماسىز ەتەتىن «ەلەكتروندىق ىزدەستىرۋ جۋرنالى» جۇيەسى ىسكە اسىرىلۋدا.
سونىمەن قاتار كەڭەستە پروبلەمالىق ماسەلەلەر، ونىڭ ىشىندە شەت مەملەكەتتەردىڭ اۋماعىندا قىلمىسكەرلەردى ۇستاۋعا تارتىلعان پوليسيا قىزمەتكەرلەرىنىڭ شتات سانىن كوبەيتۋ، سونداي-اق ىزدەۋدەگى ادامداردان ءىس جۇرگىزۋ شىعىندارىن ءوندىرىپ الۋ قاجەتتىگى ايتىلدى.
شارا سوڭىندا قىلمىستىق قۋدالاۋ ورگاندارىنىڭ باسشىلارى مەن وبلىس پروكۋرورلارىنا قىلمىسكەرلەردى ىزدەستىرۋ جانە ەكستراديسيالاۋ جونىندەگى جۇمىستى كۇشەيتۋ ۇسىنىلدى.
«باس بوستاندىعىنان ايىرۋعا بايلانىستى ەمەس بۇلتارتپاۋ شاراسى تاعايىندالعان كۇدىكتىلەردىڭ تەرگەۋ ورگاندارى مەن سوتتارعا كەلۋىنەن جالتارۋعا جول بەرمەۋگە باعىتتالعان ۇيىمداستىرۋشىلىق-قۇقىقتىق جانە وزگە دە شارالاردى قابىلداۋ تاپسىرىلدى. جالپى قىلمىسكەرلەردى ىزدەۋ جانە ۇستاۋ جۇمىستارى جالعاسۋدا»،-دەلىنگەن باس پروكۋراتۋرانىڭ باسپا ءسوز قىزمەتى تاراتقان اقپاراتتا.