بۇگىنگى كۇنى سينتەتيكالىق ەسىرتكىلەر مەن ولاردى وندىرۋگە ارنالعان زەرتحانالار - الەمدىك ماسەلەلەردىڭ ءبىرى.
ەسىرتكى ساتىلاتىن 260 سايتتىڭ بۇعاتتالۋىنا الماتى پوليسياسى باستاماشى بولدى، – دەپ حابارلايدى Almaty-akshamy.kz Polisia.kz-كە سىلتەمە جاساپ.
الماتى قالالىق پوليسيا دەپارتامەنتى ەسىرتكىنىڭ جاڭا تۇرلەرىنىڭ، ونىڭ ىشىندە سينتەتيكالىق ەسىرتكىلەردىڭ شىعۋ تەگى اينالىمىنىڭ جولىن كەسۋ تيىمدىلىگىن ارتتىرۋعا باعىتتالعان ءبىرقاتار ۇيىمداستىرۋشىلىق جانە تاجىريبەلىك شارالار كەشەنىن قابىلداۋدا.
2021 جىلدىڭ التى ايىندا قالادا جۇرگىزىلگەن جەدەل-ىزدەستىرۋ ءىس-شارالارىنىڭ ناتيجەسىندە ساتۋ فاكتىسى بويىنشا 21 ءىس-شارا جۇزەگە اسىرىلدى، سينتەتيكالىق ەسىرتكىنى ساقتاۋدىڭ 66 فاكتىسى انىقتالدى، التى كەلىدەن استام «سينتەتيكا» تاركىلەندى.
«ۇزاق مەرزىمدى ءىس-شارانىڭ ناتيجەسىندە ءبىز سينتەتيكالىق ەسىرتكىلەردى شىعاراتىن ءۇش زەرتحانانى جويدىق. جالپى، ەسىرتكىنىڭ زاڭسىز اينالىمىنا قاتىستى قىلمىستار جاڭا فورماتتارعا يە بولدى. وزەكتى ماسەلەلەردىڭ ءبىرى – سينتەتيكالىق ەسىرتكىنى كونتاكتىسىز ءادىس، ينتەرنەت ارقىلى، ەلەكتروندى تولەمدەر ارقىلى تاراتۋ تەندەنسياسى. قىلمىستىڭ بۇل ءتۇرىن، ادەتتە، جالعىز ادام ەمەس، ارنايى تاعايىندالعان مىندەتتەرى بار توپ جاسايدى. وسىلايشا، ءبىز قىلمىستىڭ ۇيىمداسقان تۇرىمەن اينالىسامىز»، – دەدى الماتى قالاسى پد ەسىرتكى قىلمىستارىمەن كۇرەس باسقارماسىنىڭ باستىعى ەرلان الماعامبەتوۆ.
سپيكەر جاقىندا پوليسيانىڭ سينتەتيكالىق ەسىرتكى ءوندىرىسى مەن ساتىلىم فاكتىسى بويىنشا ءىس-شارانى جۇزەگە اسىرعانىن اتاپ ءوتتى. ناتيجەسىندە سەگىز ايىپتالۋشى قاماۋعا الىندى. وندىرىلگەن ەسىرتكىلەر كونتاكتىسىز ءادىس (قۇپيا ورىندار) ينتەرنەت-دۇكەن ارقىلى ساتىلدى، قاراجات بانكتىك اۋدارىمدار جۇيەسى ارقىلى الىندى.
«جىل باسىنان بەرى پد ەقكب قالا اۋماعىنداعى ايماقتىق بولىمشەلەردىڭ قىزمەتكەرلەرىمەن بىرگە 1 604-تەن استام گراففيتي-جازۋلاردى انىقتادى جانە بوياۋ ارقىلى جويدى، ولاردىڭ قۇرامىندا ەسىرتكى زاتتارىنىڭ تارالۋى تۋرالى اقپارات بار. سونىمەن قاتار ەسىرتكى قۇرالدارىن، پسيحوتروپتىق زاتتاردى نەمەسە ولاردىڭ انالوگتارىن، پرەكۋرسورلاردى زاڭسىز جارنامالاۋدىڭ بەس فاكتىسى انىقتالدى. سونداي-اق جۇرگىزىلگەن جەدەل-ىزدەستىرۋ ءىس-شارالارى جانە ينتەرنەت جەلىلەرىن باقىلاۋدىڭ ارقاسىندا اعىمداعى جىلدىڭ ءبىرىنشى جارتىجىلدىعىندا ەقكب قىزمەتكەرلەرى 260 سايتتى، ونىڭ ىشىندە مەسسەندجەرلەردى، بلوگتاردى، الەۋمەتتىك جەلىلەردى، ەسىرتكى جانە پسيحوتروپتىق زاتتاردى تاراتۋ تۋرالى زاڭسىز اقپاراتتاردى انىقتادى. وسى سايتتاردى بۇعاتتاۋ تۋرالى اقپارات ق ر ىىم-نە جىبەرىلدى»، – دەدى الماعامبەتوۆ.