جەتىسۋدا وزگە ەتنوس وكىلدەرىنە مەملەكەتتىك ءتىلدى وقىتۋ قولعا الىنعان

مۇندا 30-عا جۋىق تىڭداۋشى ءتىل مەڭگەرىپ جاتىر.

الماتى وبلىسىنداعى «قوعامدىق كەلىسىم» مەكەمەسىندە وزگە ەتنوس وكىلدەرىنە مەملەكەتتىك ءتىلدى وقىتۋ قولعا الىنعان. وندا وقىتۋ «ءتىل دامىتۋ» باعدارلاماسى جانە «مامىلە. سيتۋاتيۆنىي كازاحسكيي» جوباسى نەگىزىندە  تەگىن جۇرگىزىلەدى، دەپ حابارلايدى Almaty-akshamy.kz.

اتالعان مەكەمەنىڭ قوعامدىق-كوپشىلىك شارالاردى ۇيىمداستىرۋ قىزمەتىنىڭ جەتەكشىسى نۇرلان مولداحمەتوۆتىڭ ايتۋىنشا، ساباق بارىسىندا جاڭا سوزدەر، ماقال-ماتەلدەر جاتتاۋ، مەرەكەلىك تىلەكتەر جازۋ، ءار تاقىرىپتا بەينەروليكتەر ءتۇسىرۋ سياقتى ءتۇرلى ادىستەمەلەر پايدالانىلادى.

«سول سياقتى وبلىستاعى «ءتىل» وقۋ-ادىستەمەلىك ورتالىعىندا دا  ءتىل وقىتۋ كۋرستارى جۇرگىزىلەدى. قازاق، ورىس، اعىلشىن تىلدەرىندەگى ماشىعىن شىڭداۋعا نيەت بىلدىرۋشىلەر قاتارى جىل سايىن ارتپاسا كەمىگەن جوق. ماسەلەن، ورتالىق بيىلعى جىلدىڭ ءبىرىنشى جارتىسىندا مەملەكەتتىك ءتىلدى وقىتۋ كۋرسىنا 2596 ءتىل ۇيرەنۋشىنى قابىلداعان. ولاردىڭ قاتارىندا مەملەكەتتىك مەكەمەلەر مەن بيۋدجەتتىك سالا قىزمەتكەرلەرى، سونداي-اق جەكە تۇلعالار دا بار. كۋرسقا قاتىسۋشىلاردىڭ 1326-سى، ياعني  49%-ەتنوس وكىلدەرى»، – دەلىنگەن وبلىس اكىمىنىڭ باسپا ءسوز قىزمەتىنىڭ حابارلاماسىندا.