ول بۇرىن دا سوتتالعان.
الماتىداعى جاپپاي تارتىپسىزدىك كەزىندە ۇرلانعان مىلتىق 27 جاستاعى جامبىل وبلىسىنىڭ تۇرعىنىنان تاركىلەندى، دەپ حابارلايدى Almaty-akshamy.kz Polisia.kz-كە سىلتەمە جاساپ.
قاراقشىنى قالانىڭ كريمينالدىق پوليسيا قىزمەتكەرلەرى ۇستادى.
«ۇستاۋ ءىس-شاراسى اۋەزوۆ اۋدانىنىڭ اۋماعىندا بولدى. قاڭتارداعى جاپپاي تارتىپسىزدىكتەر كەزىندە اڭشىلىق دۇكەننەن ۇرلىق جاسادى دەگەن كۇدىكپەن 27 جاستاعى ك. ەسىمدى ازامات ۇستالدى. قىلمىسكەردىڭ ولجاسى 12 كاليبرلى SIBERGUN تەگىس ۇڭعىلى مىلتىق بولدى. زاتتاي ايعاقتار تاركىلەندى جانە سوتقا دەيىنگى تەرگەۋدىڭ ءبىرىڭعاي تىزىلىمىنە ق ر قك-نىڭ 291-بابى 2-بولىگى بويىنشا تىركەلگەن قىلمىستىق ءىس ماتەريالدارىنا بىرىكتىرىلدى»، – دەيدى الماتى قالالىق پد كريمينالدىق پوليسيا باسقارماسىنىڭ باستىعى قۋاتبەك ناۋاتوۆ.
بەلگىلى بولعانداي، ۇستالعان ازامات بۇرىن دا توناۋ قىلمىسى ءۇشىن سوتتالعان. قازىرگى ۋاقىتتا كۇدىكتىنىڭ وسىعان ۇقساس قىلمىستارعا قاتىسى بار-جوعى تەكسەرىلۋدە.