كۇدىكتىلەر قاماۋعا الىندى.
الماتى پوليسياسى ەسىرتكى ءوندىرۋ جانە ساتۋمەن اينالىسقان توپتى ۇستادى، دەپ حابارلايدى Almaty-akshamy.kz Polisia.kz-كە سىلتەمە جاساپ.
الماتىنىڭ ەسىرتكى قىلمىسىمەن كۇرەسۋشىلەرىنىڭ نازارىنا 20 جاستاعى م.ەسىمدى ازامات پەن 21 جاستاعى ا. ەسىمدى ازاماتشا ءتۇستى. ولاردى قالانىڭ تۇركسىب اۋدانىنداعى مايلين كوشەسىندە ۇستادى.
«كۇدىكتىلەردىڭ قولىندا بىرنەشە پاكەت بولدى، ونىڭ ىشىندە وسىمدىك تەكتەس زاتى بار 120-دان استام بۋما جانە ءشوپتى دوزاعا ءبولىپ، وراۋعا ارنالعان جابدىق بار. تاركىلەنگەن زاتتاي ايعاقتار بويىنشا سوت-حيميالىق ساراپتاما تاعايىندالدى. جۇپتىڭ تەك ەسىرتكى تاراتۋمەن عانا ەمەس، وندىرۋمەن دە اينالىساتىنى انىقتالدى. سوڭعى ىس-ارەكەتتەرىندە ولاردىڭ سىبايلاستارى بار. ولار دا جۇپ. ەر ادام 35 جاستا، ونىڭ قۇربىسى ءارى «ارىپتەسى» نەبارى 23-تە. ولار الماتى وبلىسى تالعار اۋدانى اۋماعىنداعى ءوز ۇيىندە قىلمىستىق ءوندىرىستى باستاعان. وسى ماقساتتا تۇرعىن بولمەلەردىڭ ءبىرىن پايدالانعان. ول جەردە جۇپ ءوز ايماقتارىندا وسىرىلگەن شيكىزاتتى وڭدەگەن»، – دەدى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.
ق ر قك-نىڭ 296-بابى 4-بولىگىندە كوزدەلگەن قىلمىس بەلگىلەرى بويىنشا ەسىرتكى زەرتحاناسىنىڭ جۇمىسىندا پايدالانىلعان قۇرالدار، دايىن شيكىزات، بۇتالار تاركىلەنىپ، قىلمىستىق ءىس ماتەريالدارىنا تىركەلدى.
«سونىمەن قاتار، سوت-حيميالىق ساراپتاماعا ناشاقورلار اراسىندا «ساڭىراۋقۇلاق» دەپ اتالاتىن سۇر زات جىبەرىلدى. ال كۇدىكتىلەر قاماۋعا الىندى. ەسىرتكى زەرتحاناسى جويىلدى. قازىرگى ۋاقىتتا اشكەرەلەنگەن ەسىرتكى ساتۋشىلاردىڭ تۇراقتى «كليەنتتەرىنىڭ» شەڭبەرى قۇرىلۋدا، – دەدى ەرلان الماعامبەتوۆ.