وڭىرلىك كوممۋنيكاسيالار قىزمەتىنىڭ وكىلدەرى الماتى قالالىق پوليسيا دەپارتامەنتىنىڭ باستىعى، گەنەرال ايدىن قابدۋلدينوۆپەن كەزدەستى، - دەپ حابارلايدى Aqshamnews.kz.
گەنەرال ايدىن قابدۋلدينوۆ بۇل قىزمەتكە وسىدان ءۇش كۇن بۇرىن تاعايىندالعان. ول جۇمىسىن جۋرناليستەرمەن كەزدەسۋدەن باستادى.
كەزدەسۋ بارىسىندا ويعا الىنعان نەگىزگى باستامالار ءسوز بولدى. اتاپ ايتقاندا، الماتىداعى بارلىق مەكتەپتە كەزەڭ-كەزەڭىمەن «جاس ساقشى» دەيتىن مامانداندىرىلعان سىنىپتاردى اشۋ جوسپارى. وسى جۇمىس اياسىندا «زاڭ مەن ءتارتىپ» يدەولوگەماسى نەگىزىندە وقۋشىلارعا قۇقىق ساباقتارىن وتكىزبەك. بۇل ءوز كەزەگىندە وسى باستان جاسوسپىرىمدەردىڭ قۇقىقتىق مادەنيەتىن قالىپتاستىرىپ، پوليسيانىڭ بەدەلىن وسىرۋگە سەپ بولماقشى.
وڭىرلىك كوممۋنيكاسيالار قىزمەتىنىڭ باسشىلىعى گەنەرال ايدىن قابدۋلدينوۆپەن بىرلەسىپ، 2026 جىلعا ارنالعان ورتاق جۇمىس جوسپارىن دا تالقىلادى. وندا اقپارات قۇرالىنىڭ وكىلدەرىمەن ءتيىمدى بايلانىس ورناتىپ، قۇقىق قورعاۋ ورگاندارىن بارىنشا قوعامعا اشىق ەتۋگە كۇش سالماق ويدا.