الماتى پوليسەيلەرى شەتەلدىك ستۋدەنتتەردى ق ر زاڭناماسىن بۇزباۋعا شاقىردى

الماتىدا پوليسەيلەر شەتەلدىك ستۋدەنتتەرمەن كەزدەستى.

كەزدەسۋدىڭ نەگىزگى ماقساتى – شەتەلدىك ستۋدەنتتەردى قازاقستان رەسپۋبليكاسىنىڭ زاڭناماسىن بۇزباۋعا شاقىرۋ، دەپ حابارلايدى Almaty-akshamy.kz Polisia.kz-كە سىلتەمە جاساپ. 

«بۇگىندە الماتىدا ستۋدەنتتەر قاۋىمى كوپ جانە 180 مىڭ ادامدى قۇرايدى. ولار 36 جوعارى وقۋ ورنىندا ءبىلىم الىپ جاتىر. 900 ستۋدەنت – شەتەلدىكتەر. ستۋدەنت جاستار كەز كەلگەن قوعامنىڭ ەڭ وزىق جانە ۇيىمداسقان بولىگى سانالادى. جەكە ءتارتىپتى ساقتاپ، وقۋعا كەلگەن ەلدىڭ زاڭىن بۇزباۋ كەرەكتىگىن ەسكەرتەمىن. ستۋدەنتتەردىڭ قۇقىق بۇزۋشىلىق جاساۋىنىڭ نەگىزگى سەبەپتەرى – قولدانىستاعى زاڭناما نەگىزدەرىن بىلمەۋى، قۇقىقتىق مادەنيەتتىڭ تومەن دەڭگەيى، الەۋمەتتىك جانە تۇرمىستىق ماسەلەلەر، قوعامدىق پايدالى ەڭبەكپەن اينالىسپاۋ جانە بوس ۋاقىتتى جەتكىلىكسىز ۇيىمداستىرۋ»، – دەدى بوستاندىق اۋداندىق پوليسيا باسقارماسىنىڭ باستىعى ديدار احانوۆ.

سپيكەردىڭ ايتۋىنشا، وقۋ جىلىنىڭ باسىنان بەرى الماتىدا شەتەلدىك ستۋدەنتتەر 6 قىلمىس جاساعان. وسىنداي كەزدەسۋلەر الماتىنىڭ المالى، بوستاندىق جانە مەدەۋ اۋداندارىنداعى جوعارى وقۋ ورىندارىندا ءبىر ۋاقىتتا ءوتتى.

«ءبىز شەتەلدىك ستۋدەنتتەر مەن ەلىمىزدىڭ قوناقتارىنا قازاقستان رەسپۋبليكاسىنىڭ زاڭناماسى مەن ءتارتىبىن ساقتاۋعا، ەلدە بولعان كەزدە ۇلتارالىق جانە رۋارالىق الاۋىزدىقتى ۇمىتۋعا شاقىرامىز. ويتكەنى، سىزدەردىڭ ەلدە تۇرۋلارىڭىزدىڭ باستى باسىمدىعى – وقۋ، ءبىلىم الۋ»، – دەدى احانوۆ.