ۇسىنىلعان جوبا بويىنشا مارشرۋت قازىرگى جولدان باتىسقا قاراي 10-12 شاقىرىمعا جىلجىتىلادى
رەسپۋبليكالىق ماڭىزى بار الماتى – وسكەمەن باعىتىن قونايەۆ قالاسىنان تىس شىعارىلۋى مۇمكىن. بۇل تۋرالى الماتى وبلىسى ساۋلەت باسقارماسى باس جوسپار جانە اۋماقتى دامىتۋ باسقارماسىنىڭ باسشىسى ايدوس كۇنەسبايەۆ ايتتى، دەپ حابارلايدى Almaty-akshamy.kz Tengrinews.kz-كە سىلتەمە جاساپ.
ايتا كەتەيىك، ءقازىر بۇل باعىتتىڭ ءبىر بولىگى – الماتىدان تالدىقورعانعا دەيىن اقىلى.
ا3 تاسجولى قونايەۆ قالاسىنىڭ ءدال ورتاسىنان وتەدى. بۇل جولدىڭ بويىندا كازينو مەن ويىن زالدارى ورنالاسقان. ءبىراق بۇل تاسجول قونايەۆتىڭ جاڭا باس جوسپارىنا سايكەس كەلمەيدى.
"ءبىز الماتى-وسكەمەن تاسجولى بويىندا ورنالاسقانبىز. جولدى جىلجىتۋدى، ياعني تاسجولدى قالا سىرتىنا جىلجىتۋدى ۇسىنىپ وتىرمىز. بۇل جۇردەك ماگيسترال بولعاندىقتان، نورما بويىنشا قالادا بۇعان جول بەرىلمەيدى. بۇرىننان بار جولدىڭ ماقساتى وزگەرەدى، ول جاڭا "ىلە" شاعىناۋدانىنا اپارادى. ءقازىر بۇل رەسپۋبليكالىق ماڭىزى بار، ا3 ساناتىنداعى جول. اۋىستىرۋ بويىنشا ۇسىنىستار بەرىپ جاتىرمىز"، – دەدى كۇنەسبايەۆ.
ۇسىنىلعان جوبا بويىنشا مارشرۋت قازىرگى جولدان باتىسقا قاراي 10-12 شاقىرىمعا جىلجىتىلادى. قازىرگى باعىت جەرگىلىكتى جولعا اينالادى.
"وسى جول اراسىنا قالالىق نىسانداردى ورنالاستىرۋدى كوزدەپ وتىرمىز. بۇل اۋماقتاردا ازىرگە ەشتەڭە جوق. ماگيسترال بويىندا اسكەري نىساندار مەن قويمالار بار، ءبىراق بولاشاقتا ولاردى دا كوشىرۋ ۇسىنىلىپ وتىر"، – دەدى الماتى وبلىسى ساۋلەت باسقارماسىنىڭ باس جوسپارى جانە اۋماقتاردى دامىتۋ ءبولىمىنىڭ باسشىسى ايدوس كۇنەسبايەۆ.
سونىمەن قاتار، تەمىرجول دا قالا سىرتىنا جىلجىتىلادى، ول دا ءقازىر قونايەۆ ارقىلى وتەدى.