ششۋچينسك قالاسىندا قورعانىس ءمينيسترى كوللەدج كادەتتەرىمەن كەزدەستى
جۇمىس ساپارى بارىسىندا قورعانىس ۆەدومستۆوسىنىڭ باسشىسى، گەنەرال-پولكوۆنيك رۋسلان جاقسىلىقوۆ پەتروپاۆل، ششۋچينسك گارنيزوندارىندا بولدى، دەپ حابارلايدى Almaty-akshamy.kz.
پەتروپاۆلدا ول سولتۇستىك قازاقستان وبلىسىنىڭ اكىمى ايداربەك ساپاروۆپەن بىرگە بايلانىس جانە راديوەلەكتروندىق كۇرەس قۇرالدارىن جەتكىزۋ مەن جوندەۋدى جۇزەگە اسىراتىن س.م. كيروۆ اتىنداعى زاۋىتتا، سونداي-اق اۋىر ماشينا جاساۋ زاۋىتىندا بولدى. وندا مينيسترگە دۇركىندەتىپ اتاتىن زىمىران كەشەنى جۇيەسىن قۇرۋ جۇمىسى كورسەتىلدى.
قارۋلى كۇشتەردىڭ مەملەكەتتىك قورعانىس تاپسىرىسىن ورىنداۋدا وتاندىق قورعانىس-ونەركاسىپتىك كەشەنى كاسىپورىندارىنىڭ ماڭىزى زور. قازاقستاندىق كاسىپورىندار اسكەري تەحنيكانىڭ ەداۋىر بولىگىنە جوندەۋ جانە باسقا دا قىزمەت تۇرلەرىن كورسەتەدى.
قارۋلى كۇشتەردىڭ مۇددەسى ءۇشىن مەملەكەتتىك قورعانىس تاپسىرىسىنىڭ كوبىن وتاندىق قورعانىس-ونەركاسىپتىك كەشەنى كاسىپورىندارى قامتاماسىز ەتەتىنىن اتاپ وتكەن ءجون.
پەتروپاۆل گارنيزونىنا جاساعان ساپارىندا قورعانىس ءمينيسترى كاسىپورىن وكىلدەرىنىڭ نازارىن ءوندىرىستى ودان ءارى جەتىلدىرۋگە جانە شىعارىلاتىن قۇرىلعىلار مەن ولاردىڭ ساپاسىنا اۋداردى.
ششۋچينسك قالاسىندا قورعانىس ءمينيسترى كوللەدج كادەتتەرىمەن كەزدەستى. شوقان ءۋاليحانوۆ اتىنداعى قورعانىس مينيسترلىگىنىڭ اسكەري كوللەدجى – كاسىبي سەرجانتتار مەكتەبى. بۇل جەردە كىشى كومانديرلەردى دايارلاۋ بويىنشا ءبىلىم بەرۋ باعدارلامالارى ىسكە اسىرىلادى.
كوللەدجگە ساپارى بارىسىندا گەنەرال-پولكوۆنيك رۋسلان جاقسىلىقوۆ كادەتتەرمەن كەزدەسىپ، ولاردىڭ تۇرمىس جاعدايىمەن، تاماقتاندىرۋدى ۇيىمداستىرۋمەن، سونداي-اق بولاشاق كومانديرلەردى تولىققاندى كاسىبي دايارلاۋ ءۇشىن قاجەتتى وقۋ-ماتەريالدىق بازامەن جانە ارنايى سىنىپتارمەن تانىستى.