ماماندار ءبىلىم مەكەمەسىندە تەكسەرۋ جۇرگىزدى.
الماتى قالاسىندا №56 ورتا مەكتەپكە جارىلعىش زات قويىلعانى تۋرالى حابارلامادان كەيىن عيماراتتان وقۋشىلار مەن قىزمەتكەرلەر شۇعىل ەۆاكۋاسيالاندى، دەپ حابارلايدى Almaty-akshamy.kz قازاقپاراتقا سىلتەمە جاساپ.
الماتى قالالىق پوليسيا دەپارتامەنتىنىڭ مالىمەتىنشە، بۇگىن تۇسكى ساعات 12:00 شاماسىندا جەدەل باسقارۋ ورتالىعىنا ءبىلىم ورداسىنا جارىلعىش زات قويىلعانى تۋرالى حابارلاما تۇسكەن.
«قالانىڭ جەدەل جانە توتەنشە جاعدايلار قىزمەتتەرى العاشقى دەن قويۋ شارالارى اياسىندا ءبىلىم مەكەمەسىندە تەكسەرۋ جۇرگىزدى. وقۋشىلار مەن ۇستازدار ەۆاكۋاسيالاندى»، - دەپ حابارلادى الماتى قالالىق پوليسيا دەپارتامەنتىنىڭ رەسمي وكىلى سالتانات ازىربەك.
بەلگىلى بولعانىنداي، مەكتەپ عيماراتىن تەكسەرۋ كەزىندە جارىلىس قۇرىلعىلارى تابىلعان جوق. ءبىلىم مەكەمەسى شتاتتىق رەجيمدە جۇمىس ىستەپ تۇر.
«ءقازىر پوليسيا مەكتەپكە جارىلعىش زات قويىلعانى تۋرالى جالعان حابار تاراتقان ادامدى انىقتاپ جاتىر. ول قىلمىستىق جاۋاپقا تارتىلادى»،- دەدى سالتانات ازىربەك.