كەشە الماتى قالاسى جەتىسۋ اۋدانىنداعى N57 جالپى ءبىلىم بەرەتىن مەكتەبىندە ۇلى وتان سوعىسىنداعى جەڭىستىڭ 80 جىلدىعىنا ارنالعان «ۇلى جەڭىس: ەرلىككە تازىم، ۇرپاققا ۇلگى» اتتى مەرەكەلىك ءىس-شارا ءوتتى.
ءىس-شاراعا ۇلى وتان سوعىسى جانە تىل ارداگەرلەرىنىڭ ۇرپاقتارى، اۋعانستانداعى سوعىس ارداگەرلەرى، جەتىسۋ اۋدانى اكىمدىگى مەن اۋداندىق ءبىلىم ءبولىمىنىڭ وكىلدەرى، «امانات» پارتياسى جەتىسۋ اۋداندىق فيليالىنىڭ ءتوراعاسى، ۇستازدار قاۋىمى مەن وقۋشىلار قاتىستى.
قۇرمەتتى قوناقتاردىڭ قاتارىندا:
- الماتى قالاسى اۋعان سوعىسى ارداگەرلەر وداعىنىڭ ءتوراعاسى گورپينەنكو ۆلاديمير پەتروۆيچ؛
- چەرنوبىل ارداگەرلەرى مەن ەرەكشە ءقاۋىپ تونگەن جاۋىنگەرلەر وداعىنىڭ ءتوراعاسى پەرمينوۆ ۆالەريي پەتروۆيچ؛
- اۋعان سوعىسىنىڭ ارداگەرى كيم ۆلادلەن لۆوۆيچ؛
- چەرنوبىل اتوم-ەلەكتر ستانسياسىنىڭ جويۋشىسى كان يگور افاناسيەۆيچ؛
- چەرنوبىل اتوم ەلەكتر ستانسياسىنىڭ ارداگەرى ۋسەينوۆ انۋار بيلالوۆيچ؛
- اتا-انالار قوعامىنىڭ ءتورايىمى نۇرماعامبەتوۆا زاۋرە بەكتۇرعان قىزى بولدى.
ءىس-شارا قازاقستان رەسپۋبليكاسىنىڭ تۋىن سالتاناتتى تۇردە ەنگىزۋ جانە مەملەكەتتىك گيمندى ورىنداۋمەن باستالدى. مەكتەپتىڭ «جەتىسۋ جاۋھارلارى» وركەسترىنىڭ ونەرپازدارى قازاقتىڭ بەلگىلى كومپوزيتورلارىنىڭ شىعارمالارىن ورىندادى. وقۋشىلار كەلگەن قوناقتارعا سوعىس اندەرىن ساحنالىق قويىلىمدارمەن ۇسىنىپ، ءوز رولدەرىن بار ىنتاسىمەن سومدادى. بۇلدىرشىندەر كوركەمسوزدەن جىر وقىپ، اسەم اندەر ورىندادى. كونسەرت بارىسىندا جينالعاندار سوعىستا قازا تاپقانداردى ءبىر مينۋت ۇنسىزدىكپەن ەسكە الدى.
57 جالپى ءبىلىم بەرەتىن مەكتەپ ديرەكتورى گۇلبانۋ قونىسباي قىزى ءوز سوزىندە ەرلىك پەن قاھارماندىقتىڭ ۇلگىسىنە اينالعان ارداگەرلەرگە جىلى لەبىزىن ءبىلدىرىپ، ۇلى جەڭىستىڭ 80 جىلدىعىمەن قۇتتىقتادى. ول ءوز سوزىندە ءىس-شارانىڭ ماقساتى جاستاردىڭ ارداگەرلەرگە، اعا ۇرپاققا دەگەن قۇرمەتتى كوزقاراسىن قالىپتاستىرۋ، ءوز ەلىنىڭ تاريحىنا دەگەن قىزىعۋشىلىعىن، پاتريوتتىق جانە تۋعان جەرىنە دەگەن ماقتانىش سەزىمىنە تاربيەلەۋ ماقساتىندا ەكەندىگىنە باسا نازار اۋداردى.
"ەشكىم دە، ەشتەڭە دە ۇمىتىلمايدى. بۇل سوزدەر وتكەندى ەمەس، بولاشاقتى مەڭزەيدى. قاھارمان باتىرلارىمىزدىڭ ەرلىكتەرىن ەشكىم دە ەشقاشان ۇمىتپايدى. بۇل كۇن قاندى مايداننان ورالماي، ەلىمىز ءۇشىن سەنىمدى قورعان بولا وتىرىپ، جەڭىسكە جەتۋ ءۇشىن كۇرەسكەن اتا-بابالارىمىزدى ەسكە الۋ كۇنى"، - دەدى گۋلبانۋ قونىسباي قىزى.
شارا سوڭىندا بۇكىل زال №57 مەكتەپتىڭ مۇعالىمدەر حورىمەن بىرگە «جەڭىس كۇنى!» ءانىن شىرقادى.مۇنداي شارالاردىڭ تاربيەلىك ءمانى زور. اعا بۋىن ارداگەرلەرىمىزدىڭ كورسەتكەن ەرلىگى مەن باتىرلىعىنان بۇگىنگى ۇرپاق ساباق الادى دەگەن سەنىمدەمىز.
بارشاڭىزدى ۇلى وتان سوعىسىنداعى جەڭىستىڭ 80 جىلدىعىمەن قۇتتىقتايمىز.
تاۋەلسىز قازاقستاننىڭ باقىتتى دا بەيبىت كۇندەرى ءۇشىن ارداگەرلەرىمىزگە تاعزىم ەتەمىز!