جۇمىسشى ماماندىقتارىنىڭ جىلى اياسىندا ق ر وقۋ-اعارتۋ مينيسترلىگىنىڭ ۇيىمداستىرۋىمەن بۇگىن «قازاقستان رەسپۋبليكاسىنىڭ كوللەدجدەرىنىڭ ۇزدىك 100 ستۋدەنتى» رەسپۋبليكالىق بايقاۋىنىڭ جەڭىمپازدارىن ماراپاتتاۋ ءراسىمى ءوتتى.
بۇل بايقاۋ رەسپۋبليكانىڭ تۇپكىر-تۇپكىرىنەن كوللەدجدەردىڭ ەڭ ۇزدىك، ەڭ تالانتتى، ەڭ دارىندى ستۋدەنتتەردىڭ باسىن قوستى، دەپ حابارلايدى aqshamnews.kz.
سالتاناتتى شاراعا وقۋ-اعارتۋ ءمينيسترى، ق ر پارلامەنتى سەناتىنىڭ دەپۋتاتتارى، بيزنەس قاۋىمداستىقتاردىڭ وكىلدەرى، تەحنيكالىق جانە كاسىپتىك ءبىلىم بەرۋ ۇيىمدارىنىڭ ستۋدەنتتەرى، پەداگوگتەر مەن ارداگەرلەر قاتىستى.
بۇگىندە تەحنيكالىق جانە كاسىپتىك ءبىلىم بەرۋ سالاسى ەلىمىزدىڭ ءبىلىم بەرۋ ەكوجۇيەسىندە ستراتەگيالىق ماڭىزعا يە. بۇل جونىندە سالتاناتتى راسىمدە ءسوز سويلەگەن عاني بەيسەمبايەۆ اتاپ ءوتتى. مينيستر ۇزدىك 100 ستۋدەنتتى بولاشاقتىڭ قۇرىلىسشىلارى رەتىندە ەلگە تانىستىرۋ، ولاردىڭ ەسىمدەرىن كەڭىنەن دارىپتەۋ، جاستارعا ۇلگى ەتۋ قاجەتتىگىن ايتىپ، بۇل باعىتتا جاۋاپتى قۇرىلىمدىق بولىمشەلەرگە ناقتى تاپسىرمالار جۇكتەدى.
«ەلىمىزدىڭ بولاشاعى – ينتەللەكتۋالدى، ءبىلىمدى، زاماناۋي جاستاردىڭ قولىندا. سىزدەردىڭ ساپالى ءبىلىم الىپ، حالىقارالىق دەڭگەيدە باسەكەگە قابىلەتتى مامان رەتىندە قالىپتاسۋلارىڭىز – مەملەكەت نازارىنداعى باستى ماسەلە. بۇگىندە تەحنيكالىق ماماندىقتارعا بولىنەتىن مەملەكەتتىك تاپسىرىس جىل سايىن ۇلعايىپ كەلەدى، ستۋدەنتتەردىڭ شاكىرتاقىسى ەكى ەسەگە ارتتى. سونىمەن قاتار، ءبىلىم الۋشىلارعا ءوز كاسىبىن باستاۋعا، حالىقارالىق سەرتيفيكاتتاۋدان وتۋگە بارلىق مۇمكىندىك قاراستىرىلعان. جاستارعا باعىتتالعان ءىرى جوبالار مەن باعدارلامالار – ەلىمىزدىڭ جارقىن بولاشاعىنا جاسالعان ينۆەستيسيا. كاسىپتى يگەرگەن ادام – باقىتىن تابادى. سوندىقتان بۇل جىل سىزدەر ءۇشىن ۇلكەن مۇمكىندىكتەر جىلى»، – دەدى مينيستر.
ەكونوميكانىڭ ءتۇرلى سالالارى ءۇشىن بىلىكتى مامانداردىڭ كادرلىق رەزەرۆىن قالىپتاستىرۋ ماقساتىندا العاش رەت ۇيىمداستىرىلعان بۇل بايقاۋعا ەلىمىزدەگى تەحنيكالىق جانە كاسىپتىك ءبىلىم بەرۋ ۇيىمدارىنان 2 مىڭنان استام دارىندى ءارى كاسىبي بىلىكتى ستۋدەنت قاتىستى. وڭىرلەردە وتكەن ىرىكتەۋ كەزەڭدەرىنىڭ ناتيجەسىندە 200 ۇزدىك ستۋدەنت رەسپۋبليكالىق كەزەڭگە جولداما الىپ، ولاردىڭ اراسىنان 100 ۇزدىك جاس ماراپاتقا يە بولدى.
بايقاۋ جەڭىمپازدارى «قازاقستان رەسپۋبليكاسىنىڭ كوللەدجدەرىنىڭ ۇزدىك 100 ستۋدەنتى» دەرەكتەر بازاسىنا ەنگىزىلىپ، جۇمىسقا ورنالاسۋ ءۇشىن ارنايى سەرتيفيكاتتارمەن ماراپاتتالدى. سونىمەن قاتار ولاردىڭ ۇزدىك جوبالارىن جۇزەگە اسىرۋعا قولداۋ كورسەتىلەتىن بولادى.