الماتى ونكولوگيالىق ورتالىعىندا توق ىشەكتىڭ اسقىنعان قاتەرلى ىسىگىنە جانە اۋىر جۇرەك-قان تامىر اۋرۋىنا شالدىققان پاسيەنتكە كۇردەلى وتا ءساتتى جاسالدى.
76 جاستاعى ناۋقاس ورتالىققا اۋىر حالدە ءتۇستى. دياگنوزى - توق ىشەكتىڭ جوعارى ءبولىمىنىڭ ءىىى ساتىداعى قاتەرلى ىسىگى. ىسىك جىڭىشكە ىشەككە ءوتىپ، جىلانكوز ءتۇزىپ، اعزانىڭ ۋلانۋىنا جانە انەميانىڭ ۇدەۋىنە اكەلگەن. گەموگلوبين دەڭگەيى - 69 گ/ل (ايەلدەر ءۇشىن قالىپتى كورسەتكىش 120–150 گ/ل).
باستى قيىندىق - جۇرەكتەگى اۋىر پاتولوگيا: جۇرەكتىڭ يشەميالىق اۋرۋى، 2022 جىلى جاسالعان اورتوكورونارلىق شۋنتتاۋ جانە سول جاق قارىنشا جۇمىسىنىڭ فراكسياسى - نەبارى 28-30% (قالىپتىسى 55-70%).
"ءبىز قيىن تاڭداۋ الدىندا تۇردىق: وتا جاسالماسا، ناۋقاس ومىرمەن قوش ايتىسۋى مۇمكىن ەدى، ال جۇرەك جاعدايىنا بايلانىستى كەز كەلگەن حيرۋرگيالىق ەم-دوم اسا ءقاۋىپتى بولدى"، - دەيدى ونكولوگ اسىلبەك قارجاۋوۆ.
حيرۋرگتار، كارديولوگتار جانە انەستەزيولوگ-رەانيماتولوگتار كونسيليۋمى ومىرلىك كورسەتكىشتەر بويىنشا وتا جاساۋ تۋرالى شەشىم قابىلدادى.
ناۋقاستى وتاعا دايىنداۋ بارىسىندا ونىڭ جاعدايىن تۇراقتاندىرۋ، قان كولەمىن تولىقتىرۋ جانە انەميانى تۇزەتۋ شارالارى جۇرگىزىلدى. انەستەزيولوگتار جۇرەك رەزەرۆىنىڭ تومەندىگىن ەسكەرە وتىرىپ، جەكە انەستەزيالىق حاتتاما جاسادى.
وتا – لاپاروتوميا، كەڭەيتىلگەن وڭ جاقتى گەميكولەكتوميا جانە جىڭىشكە ىشەكتىڭ بىرنەشە بولىگىنە رەزەكسيا جاساۋ 55 مينۋتقا سوزىلدى.
زاقىمدالعان ايماقتار، ونىڭ ىشىندە ليمفا تۇيىندەرى الىنىپ، كوزگە كورىنەتىن ىسىك تىندەرى تولىق جويىلدى.
"زاماناۋي قۇرىلعىلارمەن جابدىقتالعان وتا بولمەلەرى كۇردەلى ناۋقاستاردا دا جوعارى دالدىكپەن جانە قان جوعالتۋدى ازايتا وتىرىپ جۇمىس ىستەۋگە مۇمكىندىك بەرەدى. بۇل السىرەگەن پاسيەنتتەر ءۇشىن وتە ماڭىزدى"، - دەدى اسىلبەك قارجاۋوۆ.
وتادان كەيىن ناۋقاس انەستەزيولوگيا جانە رەانيماسيا بولىمىنە اۋىستىرىلىپ، تاۋلىك بويى باقىلاۋعا الىندى.
"ءبىزدىڭ مىندەتىمىز ناۋقاستى ناركوزدان جايلى شىعۋىن قامتاماسىز ەتۋ، جۇرەك پەن وكپە قىزمەتىن قولداۋ، ترومبوەمبوليالىق جانە ينفەكسيالىق اسقىنۋلاردىڭ الدىن الۋ بولدى. جەكە ينفۋزيالىق، انتيباكتەريالدى جانە كارديوتونيكالىق تەراپيا ارقاسىندا جاعداي تۇراقتاندى"، - دەيدى رەانيماسيا ءبولىمىنىڭ مەڭگەرۋشىسى راميس مۋرادوۆ.
وتادان كەيىنگى كەلەسى كۇنى ناۋقاس بەلسەندى قوزعالا باستادى، ال ەكى كۇننەن سوڭ جالپى پالاتاعا اۋىستىرىلدى.
سەگىزىنشى كۇنى امبۋلاتوريالىق ەم جالعاستىرۋ ءۇشىن ۇيىنە شىعارىلدى.
بۇل جاعداي الماتى ونكولوگيالىق ورتالىعىنىڭ ەڭ كۇردەلى ناۋقاستارمەن دە جۇمىس ىستەي الاتىنىن ايقىن كورسەتەدى.
مۋلتيديسيپلينارلىق ءتاسىل، حيرۋرگتار مەن انەستەزيولوگتاردىڭ تاجىريبەسى، زاماناۋي مەديسينالىق جابدىق - مۇنىڭ ءبارى ءۇمىت ۇزىلگەن كەزدە دە ادام ءومىرىن ساقتاپ قالۋعا مۇمكىندىك بەرەدى.