بيىلعى قازاننىڭ قورىتىندىسى بويىنشا، قازاقستاندا تاۋارلار مەن قىزمەتتەردىڭ باعاسى 12،6 پايىز ءوستى. بۇعان بايلانىستى جىلجىمايتىن مۇلىك نارىعىندا دا قىمباتتاعان، - دەپ حابارلايدى aqshamnews.kz ءتىلشىسى.
Ranking مالىمەتىنشە، قازاندا جاڭا تۇرعىن ۇيلەردىڭ باعاسى 13،1 پايىز، ال قايتالاما نارىقتاعى باسپانا قۇنى 11،6 پايىز وسكەن.
قازاقستاندا باسپانا نەگە قىمباتتاپ جاتىر؟
باسىلىم ءتورت نەگىزگى سەبەپتى اتاعان.
ققس ءوسىمى جانە نارىقتاعى وزگەرىس
ققس مولشەرلەمەسىنىڭ 16 پايىزعا دەيىن ارتۋى باعا قالىپتاستىرۋداعى باستى فاكتورلاردىڭ ءبىرى بولدى.
"قۇرىلىس سالۋشىلار شارشى مەتردىڭ باعاسىنا الدىن الا سالىقتاردى قوسا باستادى"، - دەپ جازدى باسىلىم.
سونىڭ اسەرىنەن ساتىپ الۋشىلار باعانىڭ ءوسۋىن بولجاپ، سۇرانىس ارتتى. ال ەكىنشى نارىقتاعى ساتۋشىلار دا جاڭا ۇيلەردىڭ قىمباتتاۋىنا قاراپ، ءوز باعالارىن كوتەرە باستادى.
قوسىمشا اسەر ەتەتىن تاعى ءبىر جايت — قۇرىلىس كومپانيالارى ءۇشىن ققس بويىنشا جەڭىلدىكتىڭ 2026 جىلدىڭ 1 قاڭتارىنان باستاپ كۇشىن جويۋى.
تۇرعىن ءۇي قۇرىلىسىنا ۇلەستىك قاتىسۋ ەرەجەلەرىنىڭ قاتاڭداۋى
بيىل ۇلەستىك قاتىسۋ تۋرالى زاڭعا ءۇش پاكەت وزگەرىس ەنگىزىلگەن. ەڭ ماڭىزدىسى - ەكىنشى پاكەت. وزگەرىستەرگە سايكەس:
- ۇلەسكەرلەرمەن مامىلەلەر تەك ۇلەستىك قاتىسۋ تۋرالى كەلىسىم بويىنشا عانا جاسالۋى كەرەك؛
- تۇرعىن ءۇي كەشەندەرىن جارنامالاۋ تەك گارانتيا نەمەسە رۇقسات بولعاندا عانا رۇقسات ەتىلەدى؛
- اكىمدىكتەر مەن ينجينيرينگتىك كومپانيالار تاراپىنان باقىلاۋ كۇشەيتىلەدى.
بۇل وزگەرىستەر قۇرىلىسشىلاردىڭ مۇمكىندىكتەرىن شەكتەپ، جوبالاردىڭ ازايۋىنا الىپ كەلەدى، ناتيجەسىندە ۇسىنىس كولەمى تومەندەيدى.
سۇرانىستىڭ وزگەرۋى
باسىلىمنىڭ جازۋىنشا، قازاقستانداعى تۇرعىن ءۇي نارىعى ماۋسىمدى سۇرانىسقا تاۋەلدى. جاز بەن كۇزدىڭ باسىندا ساتىپ الۋ بەلسەندىلىگى ارتادى، سەبەبى ادامدار جىلدىڭ اياعىنا دەيىن مامىلەلەرىن اياقتاپ الۋعا تىرىسادى. وسى كەزەڭدە قۇرىلىسشىلار دا جاڭا جوبالاردى كوبىرەك ىسكە قوسادى. بۇل تابيعي سۇرانىستىڭ ارتۋىنا جانە باعانىڭ وسۋىنە ىقپال ەتەدى.
دوللار باعامىنىڭ اسەرى
ۆاليۋتا نارىعىنداعى قۇبىلۋ دا باعاعا تىكەلەي اسەر ەتەدى. دوللاردىڭ كۇشەيۋى يمپورتتىق قۇرىلىس ماتەريالدارى مەن جابدىقتاردىڭ قىمباتتاۋىنا الىپ كەلەدى، ال بۇل قۇرىلىس قۇنىنىڭ وسۋىنە سەبەپ بولادى.
ەكىنشى نارىقتاعى ساتۋشىلار دا دوللار باعامىنا قاراپ، ءوز ەسەپتەرىن سوعان سايكەستەندىرىپ، باعانى رەتتەپ وتىرادى.