بۇل - 2012 جىلى الماتى وبلىسىنىڭ قاراساي اۋدانىندا بولعان قىلمىس.
الماتىدا 10 جىل بۇرىن جاسالعان قىلمىسقا قاتىستى ايىپتاۋ ۇكىمى شىقتى، دەپ حابارلايدى Almaty-akshamy.kz ناۋرىزباي اۋداندىق پروكۋراتۋراسىنا سىلتەمە جاساپ.
اڭگىمە سوناۋ 2012 جىلى الماتى وبلىسىنىڭ قاراساي اۋدانىندا بولعان قىلمىس تۋرالى. توبەلەس كەزىندە ەر ادام قارسىلاسىنىڭ ومىرلىك ماڭىزدى مۇشەلەرىنە بىرنەشە رەت پىشاق سالعان. دەرەك بويىنشا پوليسەيلەر سوتالدى تەرگەۋ امالدارىن باستاعان. الايدا كەيىن ءىس توقتاتىلعان.
«پوليسيا كۇدىكتى ادام بولا تۇرا، جاۋاپقا تارتاتىن تۇلعانىڭ انىقتالماۋىنا بايلانىستى قىلمىستىق ءىستى نەگىزسىز توقتاتتى. وسىلايشا قىلمىسكەر جاۋاپكەرشىلىكتەن بوساعان. تەك ناۋرىزباي اۋدانى پروكۋراتۋراسىنىڭ ارالاسۋىنان كەيىن عانا قىلمىستىق ءىس قوزعالدى. الماتىدا 2012 جىلى باستالعان قىلمىستىق ىسكە قاتىستى زاڭدى قورىتىندى شىقتى»، - دەدى پروكۋرورلار.
قاداعالاۋ ورگانىنىڭ نۇسقاۋىمەن ءىس قايتا قوزعالدى. وسىلايشا، ءبىرقاتار تەرگەۋ امالى جۇرگىزىلىپ، كۇدىكتىگە ادام ولتىرۋگە وقتالۋ بابى بويىنشا ايىپ تاعىلعان. ول قاماۋعا الىندى. كەيىن پروكۋرورلار ءىستى سوتقا جىبەرگەن.
«2022 جىلدىڭ ناۋرىزىندا سوت ايىپتالۋشىعا قاتىستى ايىپتاۋ ۇكىمىن شىعاردى. ول ادام ولتىرۋگە وقتالۋ بابى بويىنشا كىنالى دەپ تانىلىپ، التى جىلعا باس بوستاندىعىنان ايىرىلدى. بيىل مامىردا اپەللياسيالىق سوت ۇكىمدى وزگەرىسسىز قالدىردى»، - دەلىنگەن حابارلامادا.
سونىمەن قاتار، پروكۋرورلار قىلمىسكەردى جاۋاپكەرشىلىكتەن بوساتۋعا جول بەرگەن پوليسيا قىزمەتكەرلەرىنىڭ ارەكەتىنە قۇقىقتىق باعا بەرۋ ءۇشىن ماتەريالداردى پد ىشكى قاۋىپسىزدىك بولىمىنە جولداعان.