«اۋىل ستاتۋسىن العىمىز كەلەدى»
الماتى وبلىسى اكىمىنىڭ باسپا ءسوز حاتشىسىنىڭ ايتۋىنشا، ساياجايلارعا ينجەنەرلىك جانە ينفاقۇرىلىمدىق جۇيەنى قاراستىرۋ جوسپارلانىپ جاتىر
«اۋىل ستاتۋسىن العىمىز كەلەدى». الماتى وبلىسىنداعى تالعار ساياجايىنىڭ تۇرعىندارى تۇرمىسىمىز تۇرالاپ قالدى دەپ باس كوتەردى، دەپ حابارلايدى Almaty-akshamy.kz Almaty.tv–گە سىلتەمە جاساپ.
جارىق ءجيى ءوشىپ، جولىمىز جاسالمايدى دەگەن جۇرت، ءقازىر تۇرعىندار ءوزارا قىرقىسىپ وتىر دەيدى. ولاردىڭ ايتۋىنشا ساياجايدا ءبىرى قازىرگى ءتوراعاعا قارسى بولسا، ەندى ءبىرى قولدايدى.
«ۇرلىق كوپ. اۋىل بولساق، حالىق تا تىنىشتالادى. ەلەكتر جارىعىن ەسەپتەۋىش قۇرالىمەن تولەيمىز. ءبىزدىڭ كىشكەنتاي بالامىز بار، توڭازىتقىشىمىز بار، ول كۇيىپ كەتتى، كىم تولەيد»، – دەدى ساياجاي تۇرعىنى اسەل ايناقۇلوۆا.
تۇراقسىز توقتىڭ كەسىرىنەن تۇرمىستىق تەحنيكانىڭ ءبارى ىستەن شىقتى دەگەن تۇرعىندار سۋدى دا سۇراپ ىشە المايتىن كەز بولادى دەيدى. سەبەبى، ءتوراعاعا شاعىم ايتسا تىرشىلىك ءنارىن دە ءوشىرىپ تاستايتىن كورىنەدى.
«بىزدە 2 ميلليون 700 مىڭ قارىز دەيدى. ول مۇمكىن ەمەس حالىق ونداي قارىز بولۋى. ويتكەنى ءبىز دەگەن اقشانى تولەيمىز 26 تەڭگەدەن، ولار 19 تەڭگەمەن تولەيدى. 7 تەڭگە ءتوراعا قالتاسىناتۇسەدى»، – دەدى ساياجاي تۇرعىنى ەرلان جامالبەكوۆ.
دەر كەزىندە جارىقتىڭ اقىسىن تولەدىك دەگەن جۇرت ەسەبىن قازىرگى ءتوراعادان سۇراپ وتىر. ال باسشى اۋىلدىڭ ءبىراز ماسەلەسىن رەتتەگەنىن جانە ەسەپ بەرۋگە دايىن ەكەنىن جەتكىزدى.
«2019 جىلى وسى سۋدى مەن جالعىز ءجۇرىپ ءبىتىردىم. 2-ترانسفورماتوردى قويعىزدىم. 11 جىل بۇرىن قارىزىم بولعان جوق. ەندى 2 ايەل كەلدى دە. حالىقتى 2-گە ءبولدى. بۇرىنعا ءتوراعا قاشىپ كەتكەن كەزدە، حالىق 3 اي جارىقسىز قالعان. ءقازىر زاڭدى. وسى جەردىڭ تۇگەل قۇجاتىن قالپىنا كەلتىردىم»، – دەدى «تالعار» ساياجايىنىڭ ءتوراعاسى گۇلشات ارپەيسوۆا.
كەڭدالا اۋىلدىق وكرۋگىنە 80 ساياجاي قارايدى. اكىمنىڭ ايتۋىنشا، ءار ساياجايدىڭ وزدەرى سايلاعان ءتوراعالارى بار. سوندىقتان زاڭ بويىنشا اكىمدىكتىڭ ارالاسۋعا قۇقى جوق. ءبىراق اۋىل ستاتۋسىن الىپ بەرۋ ماسەلەسىن وبلىس ورتالىعىنا جەتكىزىپتى.
«2 اي بويى ءبىز وسى ستاتۋس ماسەلەسىمەن جۇمىس جاسادىق. قانات الدابەرگەن ۇلىنىڭ تاپسىرماسىمەن ءقازىر الماتى وبلىسىنداعى ساياجايلارعا ستاتۋس بەرۋ ماسەلەسى كوتەرىلىپ جاتىر. كەرەك اقپاراتتىڭ ءبارى تالدانىپ، باسشىلىققا جىبەرىلدى»، – دەدى كەڭدالا اۋىلدىق وكرۋگى اكىمى الماس نۇرداۋلەت ۇلى.
«الماتى وبلىسى اكىمىنە وبلىس اۋماعىنداعى ساياجايلارعا اۋىل ستاتۋسىن بەرۋ تۋرالى ماسەلە جولدانعان بولاتىن. بۇل تەك اتالعان تالعار ساياجايىنا قاتىستى ەمەس، بارلىق ەلدىمەكەنگە قاتىستى. ساياجايلارعا قالاداعىداي، ينجەنەرلىك جانە ينفاقۇرىلىمدىق جۇيەنى دە قاراستىرىپ بەرۋ جوسپاردا بار»، – دەدى الماتى وبلىسى اكىمىنىڭ باسپا ءسوز حاتشىسى رۋسلان سارسەيەۆ.
تالعار اۋداندىق كوممۋنالدىق ءبولىمى ساياجايداعى جارىق ماسەلەسى ءجيى وشەتىنىن راستاپ وتىر. وعان تۇرعىنداردىڭ قارىز بولۋى سەبەپ دەيدى. ال ەندىگى جارىق بەرەشەك وتەلمەي قوسىلمايتىن كورىنەدى.