پروكۋراتۋرا مەرزىمى وتپەي جاتىپ قوقىستان تابىلعان دارىلەرگە دە قاتىستى تەكسەرۋ جۇرگىزەتىنىن مالىمدەدى.
ەكولوگيالىق اپات. كەزىندە اۋدان ورتالىعى بولعان الماتى وبلىسىنداعى شەلەك اۋىلىنىڭ ماڭى قوقىس دالاسىنا اينالىپ بارادى، دەپ حابارلايدى Almaty-akshamy.kz Almaty.tv-گە سىلتەمە جاساپ.
تۇرعىنداردىڭ ايتۋىنشا، لاستانعان اۋماق قورشاۋسىز جاتقاندىقتان، بەلگىسىز ادامدار مۇندا كەلىپ كورىنگەن زاتتى توگىپ كەتەدى. تۇرمىستىق قوقىس قانا ەمەس، مەديسينالىق قالدىقتاردى دا، ءتىپتى جانۋار ولەكسەسىن دە تاستايدى ەكەن. ال ونى قاڭعىعان يتتەر كەمىرىپ، كەيدە اۋىل ىشىنە تاسيدى
«قوقىس الاڭى قورشالماعان. ەشقانداي بەلگى دە قويىلماعان. ول جەر استى سۋىمەن اۋىلدارعا بارادى. ءبارى سول سۋدى ءىشىپ وتىر. 4-5 مالىم بار ەدى، ءولدى»، – دەدى شەلەك اۋىلىنىڭ تۇرعىنى ەرقانات بايجاراسوۆ.
«قالادان شىققان قوقىستى پوليگونعا اكەلىپ، توگەدى. «قايدان كەلدىڭ؟» دەپ سۇراعانىمىزدا، جۇرگىزۋشىلەر قالادان كەلگەنىن ايتقان»، – دەدى شەلەك اۋىلىنىڭ تۇرعىنى نۇرمۇحامەد مۇحامەدجان.
قوقىس دالاسىنا اينالعان اۋماقتا توگىلگەن مىنا قارا سۇيىقتىقتىڭ نە ەكەنىن ءدوپ باسىپ ايتا المايمىز. الايدا تۇرعىنداردىڭ سوزىنە سەنسەك، ودان كەلەر زيان كوپ. ال جەردەگى قوقىس شاشىلىپ جاتىر. ايتا كەتسەك، قوقىس باسقان اۋماقتىڭ يەسى بار. ول ازامات ج ش س رەتىندە ءدال وسى قالدىقتاردى وڭدەۋ سىندى قىزمەت كورسەتۋى ءتيىس بولعان. مۇنى وزدەرى دە مويىنداپ وتىر.
«شەلەكتە قوقىس توگەتىن ارنايى ورىن جوق. ەڭ جاقىنى تالعار اۋدانىندا ورنالاسقان. ءبىز ينۆەستيسيالىق باعدارلاما ارقىلى قوقىس وڭدەۋ پوليگونىن سالۋعا ءوتىنىش بەردىك. ياعني، مەديسينالىق قالدىقتاردى ورتەيتىن ارنايى پەش قويدىرۋ جوسپاردا بار. الايدا جەرگە يەلىك ەتۋگە رۇقساتتى 1 جىل بۇرىن عانا الدىق. ەندى ىسكە كوشۋ ءۇشىن ەكولوگيا كوميتەتىنىڭ جاۋابىن كۇتىپ وتىرمىز»، – دەدى «باليس» ج ش س اتقارۋشى ديرەكتورى ولجاس تويشىبەكوۆ.
و باستا ماسەلەنى 1 جىل ىشىندە رەتتەيمىن دەپ ءسوز بەرگەن كاسىپكەر مەكەمەدەن جاۋاپ قاشان كەلەتىنىن بىلمەيدى. الماتى وبلىستىق ەكولوگيا دەپارتامەنتىنىڭ وكىلى بولسا، موراتورييگە بايلانىستى دايەكسىز تەكسەرۋ جۇرگىزە المايتىنىن ايتتى.
«پرەزيدەنتتىڭ جارلىعىنا سايكەس، كىشى جانە شاعىن بيزنەسكە تەكسەرۋ توقتاتىلدى. كوميتەت رۇقسات بەرگەن جاعدايدا، ارى قاراي پروكۋراتۋراعا تىركەۋگە جىبەرەمىز. ال تىركەلسە، دەپارتامەنت تاراپىنان ءتيىستى شارالار قابىلداناتىن بولادى»، – دەدى وبلىس بويىنشا ەكولوگيا دەپارتامەنتىنىڭ ءبولىم ينسپەكتورى دانيار ومىربەكوۆ.
ءىستىڭ اق-قاراسىن انىقتاۋ ماقساتىندا اۋداندىق پروكۋراتۋراعا دا باردىق. قۇزىرلى ورگان وكىلدەرىنىڭ دەرەگىنشە، ءتيىستى مەكەمەلەر تەكسەرۋ جۇمىستارى بويىنشا جاۋاپتى 30 قاڭتارعا دەيىن بەرۋى كەرەك.
«جەر «باليس 2007» جشس-عا ينۆەستپروەكت بويىنشا بەرىلگەن. سول ينۆەستپروەكت بويىنشا جوبانىڭ ىسكە اسۋ زاڭدىلىعىن تەكسەرىپ جاتىرمىز»، – دەدى ەڭبەكشىقازاق اۋدانى پروكۋرورىنىڭ ورىنباسارى ايدوس جۇمابايەۆ.
پروكۋراتۋرا مەرزىمى وتپەي جاتىپ قوقىستان تابىلعان دارىلەرگە دە قاتىستى تەكسەرۋ جۇرگىزەتىنىن ءمالىم ەتتى. زاتتاي ايعاق رەتىندە الىنعان قوراپتار ەكسپەرتيزاعا جولدانباق. ايتا كەتسەك، الماتى وبلىسىنىڭ وزىندە 355 زاڭسىز قوقىس ءۇيىندىسى انىقتالىپ، ءبىرازى رەتكە كەلتىرىلگەنىمەن، ءالى دە تەكسەرۋ جۇمىسى جالعاسىپ جاتىر.