مۇنى جەرگىلىكتى اكىمدىك وكىلدەرى دە جوققا شىعارمادى
الماتى وبلىسىنداعى ەلدى مەكەن مەن ساياجايدا تۇراتىن 2 مىڭنان استام بالا 500 وقۋشىعا عانا ارنالعان مەكتەپتەگى ورىنعا تالاسىپ وقىپ جاتىر، دەپ حابارلايدى Almaty-akshamy.kz Almaty.tv-گە سىلتەمە جاساپ.
قاراساي اۋدانىنا قاراستى كوكوزەك اۋىلىنداعى ءبىلىم ورداسى 3 اۋىسىممەن وقىسا دا، ماسەلە رەتتەلەر ەمەس. مۇنى جەرگىلىكتى اكىمدىك وكىلدەرى دە جوققا شىعارمادى. الايدا وقۋشىلاردىڭ داۋرىققان اتا-اناسى «بيلىكتەگىلەردىڭ شىندىقتى مويىنداعانى ەمەس، ناقتى ىسكە كىرىسكەنى كەرەك» دەيدى.
قاراساي اۋدانىنداعى 12 مەكتەپتە بيىل دا ورىن تاپشى، سوندىقتان 3 اۋىسىمدا ءبىلىم بەرۋگە ءماجبۇر. سالدارىنان ساباقتىڭ باستالار ۋاقىتى دا، اياقتالار ءساتى دە وزگەرگەن. ماسەلەن، كوكتوعان مەن اقسەڭگىر اۋىلىنداعى جۇرت "ءبىر بالانى مەكتەپكە تاڭدا اپارساق، ەكىنشىسىن تۇسكە تامان، ال ءۇشىنشىسىن كەشكە قاراي كەزەك-كەزەك اتتاندىرىپ وتىرامىز" دەيدى.
«11 نەمەرەم بار. ىشىندە 0، 1، 2 سىنىپتاردا وقيتىندارى بار. تاڭەرتەڭ وقيدى ولار. تۇستەن كەيىن وقيتىن 9 سىنىپتاعى قىزدارىمىز تۇستەن كەيىن شىعادى، كەشكى 7-8-دەردە كەلەدى»، – دەدى كوكتوعان اۋىلىنىڭ تۇرعىنى مەحريزا تولتەنوۆا.
شالعاي اۋىلداعى وقۋشىلاردىڭ دەنى ءبىلىم ورداسىنا مەكتەپ اۆتوبۋسىمەن قاتىنايدى. اتا-انالاردىڭ سوزىنشە، مۇندا دا ورىن تاپشى. "اۋىل بالالارىن الىپ كەتۋگە كەلگەن كولىك ءبىرىنشى اۋىلدان شىقپاي جاتىپ، ءبىر ساتتە لىق تولاتىن كورىنەدى. سونىڭ سالدارىنان وقۋشىلار ءبىر-بىرىن يتەرىپ، مەكتەپكە جەتكەنشە سىعىلىسىپ بارادى" - دەيدى.
«30 بالا سياتىن اۆتوبۋسقا 60-70 بالانى وتىرعىزامىز. اۆتوبۋس وتە كىشكەنتاي»، – دەدى كوكتوعان اۋىلىنىڭ تۇرعىنى سالتانات بايعابىل.
كوكتوعانداعى ايالداماعا سول ماڭداعى ساياجايدا تۇراتىن وقۋشىلار دا كەلەدى. الايدا بۇل جەرگە جەتۋ ءۇشىن ولار ەڭ الدىمەن شاڭى بەتىنە شىعىپ، جاڭبىرلى كۇندەردە مي باتپاق بولاتىن قوتىر جولمەن جۇرەدى.
بالالارى مەكتەپتەن كەش قايتقاندىقتان، اتا-انا قولدارىنا شام الىپ، جولىن توساتىن كورىنەدى. سەبەبى اۋىلدا جارىق جوق، ونىڭ ۇستىنە قاڭعىعان يت تە كوپ دەيدى. الايدا كوكوزەكتەگى مەكتەپ ديرەكتورى وقۋشىلار قاۋىپسىزدىگى ءۇشىن ارنايى كەزەكشىلىكتىڭ بارىن ايتىپ اقتالدى.
«نەگىزىندە مەكتەبى جوق ەلدى مەكەندەردەن تاسىمالداۋ ۇيىمداستىرىلعان. ارنايى كەزەكشىلەر قويىلعان. ولار شىعارىپ سالادى جانە قارسى الادى»، – دەدى كوكوزەك اۋىلىنداعى ورتا مەكتەپ ديرەكتورى ءجاميلا مانكەيەۆا.
مەكتەپ ديرەكتورىنىڭ سوزىنشە، بۇگىندە 2 مىڭنان استام بالا وقيتىن كوكوزەكتەگى ورتا مەكتەپ 2000 جىلدارى سالىنعان. ال ورىن تاپشىلىعى وسىدان 2 جىل بۇرىن بىلىنە باستاپتى. قاراساي اۋداندىق ءبىلىم ءبولىمى بۇل ماسەلە بويىنشا جۇمىس ءقازىر قىزۋ ءجۇرىپ جاتىر دەيدى. سوزىنە سەنسەك، الداعى 1-2 جىلدا ءدال سول كوكوزەك اۋىلىندا 1200 ورىندىق ءبىلىم ورداسى بوي كوتەرمەك.
«ءۇش اۋىسىمدى 12 مەكتەپتىڭ 3-ەۋىنە 600 ورىندىق جاپسارجاي قۇرىلىسى جۇرگىزىلىپ جاتىر. جاڭا ءۇش مەكتەپتىڭ قۇرىلىسى جۇرگىزىلىپ جاتىر. قالعان ءۇش مەكتەپكە جاڭا مەكتەپ قۇرىلىسىن جۇرگىزۋ ءۇشىن جەر تەلىمدەرى تولىق قاراستىرىلدى. اكتىسى بار. قازىرگى ۋاقىتتا جوبالىق قۇجاتتامالارى دايىندالۋدا»، – دەدى قاراساي اۋداندىق ءبىلىم ءبولىمى باسشىسىنىڭ مىندەتىن اتقارۋشى اسەل ەركىمبايەۆا.
اكىمدىك وكىلى ءۇش اۋىسىمدى مەكتەپتەردىڭ جۇكتەمەسىن ازايتۋ ماقساتىندا جۇمىستار ءجۇرىپ جاتقانىن ايتادى. الايدا وعان قاتىنايتىن اۆتوبۋستىڭ باعىتىن ۇزارتۋ نەمەسە سانىن ارتتىرۋ ماسەلەسى قالاي شەشىلەتىنىن ناقتى ايتپادى. ايتا كەتسەك، قاراساي اۋدانىندا 78 مىڭنان استام وقۋشى 52 مەكتەپتە ءبىلىم الىپ جاتىر.