قاراساي اۋدانىندا جول جەكەنىڭ قاراماعىنا ءوتىپ كەتكەن

جاۋاپتى مەكەمەلەر ەل سۇراۋىنا جاۋاپ بەرە الماي وتىر

قاراساي اۋدانىندا كوپتىڭ قولدانىسىنداعى جول جەكەنىڭ قاراماعىنا ءوتىپ كەتكەن. ال جاۋاپتى مەكەمەلەر ەل سۇراۋىنا جاۋاپ بەرە الماي وتىر. مەكتەپكە اپارار باعىتتىڭ قالاي باقىلاۋدان شىعىپ كەتكەنىن جەرگىلىكتى اكىمدىك تە بىلمەيدى، دەپ حابارلايدى Almaty-akshamy.kz Almaty.tv-گە سىلتەمە جاساپ.

ەلدى الاڭ قىلعان اۋماق - وسى. و باستاعى جوسپار بويىنشا ءارى كوپتىڭ قولىنداعى قۇجاتقا سايكەس مۇندا جول ءتۇسۋى كەرەك. ءبىراق 5 اي بۇرىن ءۇيدىڭ يەسى وزىنە تيەسىلى اۋماقتى قورشاعان. ماسەلەنىڭ توركىنى - جول ءۇستىن جەكەمەنشىككە بەرىپ جىبەرگەندەردە جاتىر.

«بۇرىنعى اكىم بىلاي ساتىپ كەلگەن، قازىرگى اكىم بىلاي ساتقان. ەكى ورتادا جولدى جاۋىپ تاستاعان، بولدى. سونشا حالىق مىنا جەردى، قانشاما سەميا، ەشكىم بىلاي بارا الماي تۇر»، – دەدى جىبەك جولى اۋىلىنىڭ تۇرعىنى سالامات بەكجان.

ەلدىڭ الدى 2012-دە كوشىپ كەلگەن. ال 2017 جىلى كورسەتىلگەن اۋماقتىڭ جول تيپىندە قولدانىسقا بەرىلۋى جونىندە قۇجات راسىمدەلىپتى. وسى تۇستا تۇسىنبەستىك تۋادى: ءۇي سالىپ، جولدى قورشاپ العان ازاماتتىڭ دا زاڭدى قاعازى بار.

ءتۇيىنى تارقاماي تۇرعان تۇيتكىلگە قاتىستى ەشكىم ناقتى جاۋاپ بەرگەن جوق. جەردىڭ قولدانىس ءتيپىن كىمنىڭ، قاشان وزگەرتكەنىن سۇراپ ەك، اۋدان مەن اۋىل اكىمشىلىگى ءبىر-بىرىن نۇسقاۋدان ءارى اسپادى.

«اۋدانعا باعىنىشتى بولىمدەردىڭ تاراپىنان بەرىلگەن شىعار ول، مەن ناقتى بىلمەيمىن. ءبىراق ءبىزدىڭ جىبەك جولى اكىمى اپپاراتىنىڭ تاراپىنان ەشقانداي جەر بەرىلگەن جوق»، - دەدى جىبەك جولى اۋىلدىق وكرۋگى اكىمىنىڭ ورىنباسارى ديدار نۇراقىنوۆ.

«گەنپلان بويىنشا جول قاراستىرىلعان ول اۋماقتا. سول سەبەپتى جىبەك جولى اۋىلدىق وكرۋگى اكىمىنىڭ ورىنباسارى ارىز جازعان، سوتقا ارىزدانۋىڭىزدى سۇرايمىز دەپ»، –دەدى  قاراساي اۋداندىق اكىمى اپپاراتى قۇرىلىس جانە ساۋلەت ءبولىمىنىڭ مامانى جانىبەك قايىرجان ۇلى.

ەكى اكىمدىكتىڭ مامانى دا ماسەلە تەك سوتتا شەشىلەدى دەپ وتىر. ول ءۇشىن تۇرعىندار ارىزدانۋى كەرەك. ەندىگىدە جالپى قولدانىستاعى جەردىڭ قاشان، قانداي جولمەن جەكەمەنشىككە ءوتىپ كەتكەنىن تەك قۇزىرلى ورگاندار انىقتاي الادى.