ونەر مەكتەبىنە دە زامانبەك ءنۇرقادىلوۆتىڭ ەسىمى بەرىلدى.
كەگەن اۋدانىنىڭ ورتالىعىندا مەملەكەت جانە قوعام قايراتكەرى زامانبەك نۇرقادىلوۆكە ارنالعان ەسكەرتكىش-بيۋستتىڭ اشىلۋ سالتاناتى ءوتتى، دەپ حابارلايدى aqshamnews.kz
وبلىستىق اكىمدىكتىڭ مالىمەتىنشە، بۇل ءىس-شارا مەملەكەت باسشىسى قاسىم-جومارت توقايەۆتىڭ تاپسىرماسى اياسىندا جۇزەگە اسىرىلعان.
ەسكەرتكىشتىڭ اشىلۋ ءراسىمى زامانبەك ءنۇرقادىلوۆ اتىنداعى ونەر مەكتەبىنىڭ الاڭىندا ۇيىمداستىرىلدى. سالتاناتتى شاراعا مەملەكەت جانە قوعام قايراتكەرلەرى، اقىن-جازۋشىلار، تانىمال تۇلعالار مەن قايراتكەردىڭ وتباسى مۇشەلەرى قاتىستى. ەسكەرتكىشتى وبلىس اكىمىنىڭ ورىنباسارى نۇرجان قۇدايبەرگەنوۆ، قوعام قايراتكەرلەرى توققوجا ەستەنوۆ پەن بولات نۇرعازييەۆ جانە زامانبەك ءنۇرقادىلوۆتىڭ ۇلى قايرات ءنۇرقادىلوۆ اشتى.
وبلىس اكىمىنىڭ ورىنباسارى ءوز سوزىندە قايراتكەردىڭ ەل دامۋىنا قوسقان زور ۇلەسىن اتاپ ءوتىپ، ونىڭ ەڭبەگىنىڭ ۇلت تاريحىندا ماڭگى ساقتالاتىنىن جەتكىزدى:
بۇل ەسكەرتكىش – حالقىمىزدىڭ قايراتكەرگە دەگەن شىنايى قۇرمەتىنىڭ بەلگىسى. ۇلت جاناشىرى رەتىندە زامانبەك ءنۇرقادىلوۆ ەل ەگەمەندىگىنىڭ نىعايۋىنا ەلەۋلى ۇلەس قوستى. وسىنداي تۇلعالاردىڭ ەڭبەگىن ۇرپاققا مۇرا ەتۋ – ءبىزدىڭ ورتاق پارىزىمىز. سونداي-اق، بيىكتىگى 4،5 مەتر بولاتىن بۇل تۋىندىنىڭ اۆتورلارى ايدوس بۇركىتبايەۆ پەن تيمۋر نۇرمۇحامەتوۆكە العىسىمىزدى بىلدىرەمىز.
سالتاناتتى راسىمنەن كەيىن قاتىسۋشىلارعا زامانبەك ءنۇرقادىلوۆتىڭ ءومىرى مەن قىزمەتى تۋرالى «نە تولكو و سەبە» اتتى كىتاپتىڭ 300 داناسى تاراتىلدى.