قىتايلىق شاحماتشى دين ليجەن چەمپيون اتاندى
ەلوردادا ءبىر ايعا جۋىق جالعاسقان شاحماتتان الەم چەمپيوناتىنىڭ جابىلۋ سالتاناتى بولدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
الەم چەمپيوناتىنىڭ ءتۇيىنىن قويىپ، قورىتىندىسىن جاريالاۋ ءۇشىن پرەمەر-مينيستردىڭ ورىنباسارى التاي كولگىنوۆ، حالىقارالىق شاحمات فەدەراسياسىنىڭ باسشىسى (FIDE) اركاديي دۆوركوۆيچ جانە قازاقستان شاحمات فەدەراسياسىنىڭ پرەزيدەنتى تيمۋر تۋرلوۆ ساحناعا كوتەرىلدى.
اركاديي دۆوركوۆيچ وسى تۋرنيردە الەم چەمپيونى اتانعان قىتايلىق دين ليجەندى ماراپاتتار الدىندا اقتىق سايىسقا شىققان قوس شاحماتشىنىڭ يىعىنا شاپان جابىلدى.
«سىزدەردى وسىنداي يگى شارادا جولىقتىرعانىمىزعا قۋانىپ تۇرمىن. شاحماتتان الەم چەمپيوناتى ەلىمىزدىڭ باس قالاسى استانادا وتكەنىن ماقتان تۇتامىز. اقتىق سىندا وتە تارتىستى، قىزىق ويىن كوردىك. ارينە، وعان دەيىنگى ويىندار دا اسا تارتىستى بولدى. ءبىزدىڭ ەلدە وتكەن چەمپيونات تاريحي وقيعامەن ەستە قالىپ جاتىر. ويتكەنى جاڭا چەمپيوننىڭ ەسىمى بەلگىلى بولدى. دين ليجەن مىرزانى وسى ۇلكەن جەتىستىگىمەن قۇتتىقتايمىز. سونداي-اق، يان مىرزاعا بولاشاقتا ۇلكەن جەڭىستەر تىلەيمىن»، - دەدى التاي كولگىنوۆ قۇتتىقتاۋ سوزىندە.
سونىمەن قاتار، بۇگىن حالىقارالىق شاحمات فەدەراسياسىنىڭ پرەزيدەنتى اركاديي دۆوركوۆيچ پەن قازاقستان شاحمات فەدەراسياسىنىڭ پرەزيدەنتى تيمۋر تۋرلوۆ جالپى ءبىلىم بەرەتىن مەكتەپتەر اراسىندا العاشقى الەم چەمپيوناتىن وتكىزۋ تۋرالى شارتقا قول قويدى.
ۇيىمداستىرۋشىلاردىڭ ايتۋىنشا، مۇنداي چەمپيونات الەمدە العاش رەت وتكىزىلمەك.
ال وعان كانىگى سپورتشى سانالاتىن شاحمات كلۋبتارى مەن ۇيىرمەلەردىڭ تاربيەلەنۋشىلەرى ەمەس، قاراپايىم وقۋشىلار، ياعني، اۋەسقوي شاحماتشىلار قاتىسادى.
استانادا ەرەسەكتەر اراسىندا وتكەن الەم چەمپيوناتىنىڭ اقتىق ويىنىندا قىتايلىق شاحماتشى دين ليجەن رەسەيلىك يان نەپومنياششييدى جەڭىپ، 17ء-شى الەم چەمپيونى اتاندى.
كلاسسيكالىق ۋاقىت ولشەمىندەگى 14 پارتيا 7:7 ەسەبىمەن تەڭ اياقتالسا، 4 بليس-پارتيانىڭ اقىرعى ايقاسىندا قىتايلىق شاحماتشى رەسەي شاحماتشىسىنان مىقتى ەكەنىن دالەلدەپ بەردى.
ايتا كەتۋ كەرەك، دين ليجەن وسى تۋرنيرگە قاتىسۋدان باس تارتقان 16-شى الەم چەمپيونى ماگنۋس كارلسەننىڭ ورنىنا جاڭا چەمپيون بولىپ تىركەلدى.
استاناداعى چەمپيوناتتىڭ جالپى جۇلدە قورى 2 ملن ەۋرو بولسا، سونىڭ 55% جۇڭگو شاحماتشىسىنىڭ قانجىعاسىندا كەتتى.