اۋىل اكىمى بولسا قىلمىستىڭ كوبەيىپ كەتكەنىن ايتىپ، مامان تاپشىلىعىن العا تارتتى
الماتى وبلىسىندا ۇرىلار ءبىر كۇندە 4 ءۇيدى توناپ كەتتى. وقيعا تالعار اۋدانىنا قاراستى كوكتال اۋىلىندا بولعان. وسىعان بايلانىستى تۇرعىندار نارازىلىققا شىعىپ، پوليسيانىڭ ارەكەتسىزدىگىنە شاعىمداندى، دەپ حابارلايدى Almaty-akshamy.kz Almaty.tv-گە سىلتەمە جاساپ.
تۇرعىنداردىڭ ايتۋىنشا، اۋىلدا ءتارتىپ ساقشىلارى بولماعاندىقتان باۋكەسپەلەر وڭاي ولجانى كاسىپكە اينالدىرعان. اۋىل تۇرعىندارى ۇرىلاردىڭ ارەكەتىنەن ابدەن مەزى بولعان. وڭاي ولجاعا كەنەلىپ ۇيرەنگەندەر ۇيدە ەشكىم جوق ىمىرت ۋاقىتتا كيىم-كەشەكتەن باستاپ، تەحنيكاعا دەيىن ۇپتەپ كەتەدى ەكەن. جيىلعان جۇرتشىلىقتىڭ ايتۋىنشا، باۋكەسپەلەر بۇل ءىستى 2018 جىلدان باستاپ كاسىپكە اينالدىرعان. ءبىراق قىلمىس ءالى اشىلماپتى.
«ۇرىنى ۇستاۋ كەرەك قوي. ول كىسى ۇيرەندى. جەرگىلىكتى پوليسيا ارەكەت ەتپەيدى، اكىم جۇمىس ىستەمەيدى ەش ناتيجە جوق. ءبىز قاراپايىم حالىقتىڭ ايقايىن ەشكىم ەستىمەيدى. ول ۇرلاي بەرەدى»، – دەدى كوكتال اۋىلىنىڭ تۇرعىنى بوتا نۇقاتوۆا.
«2018 جىلى ءبىزدىڭ ۇيدە ۇرلىق بولدى. الاتىن زاتتارى سول تەلەديدار، كومپيۋتەر، پرينتەر، شاڭسورعىش بولدى. ءبارى دە جاڭا. قىمبات تەحنيكا بولاتىن»، – دەدى كوكتال اۋىلىنىڭ تۇرعىنى نۇرگۇل بەكسەيىتوۆا.
شىڭعىس يبرايەۆتىڭ شاڭىراعى دا ۇرىلاردىڭ قارماعىنا تۇسكەن. ول 1 ماۋسىمدا بالالارىن قىدىرتۋ ءۇشىن وتباسىمەن الماتىعا كەتىپ قالعان. ۇيىنە كەلسە 650 مىڭ تەڭگەسى مەن التىن بۇيىمدارى جانە باسقا دا باعالى زاتتارى قولدى بولعان.
ءۇي يەسىنىڭ ايتۋىنشا، ۇرى الدىن الا جوسپار بويىنشا ارەكەت ەتكەن. اۋەلى قۇرىلعىمەن تەرەزەنى بۇزىپ، ۇيگە كىرگەن. ال اعاشتى بىرەۋ كەلگەن جاعدايدا قارسىلىق تانىتۋ ءۇشىن بىرگە الىپ ءجۇرىپتى. كەيىن قوماقتى اقشاعا كەنەلگەن ادام قۇرالداردىڭ ءبارىن تاستاپ كەتكەن.
«كەشە كەشكى ساعات 10:00-دە ۇيگە كەلگەندە ۇيىمىزگە ۇرلىق تۇسكەنىن بايقادىق. سول ساتتە ءبارىمىز دالاعا شىعىپ، پوليسياعا شاعىمداندىق. مەن پوليسيانىڭ جۇمىسىنا قاناعاتتانبايمىن. نەگە پوليسيا سونداي ۇزاق ۋاقىتتا كەلەدى. ەگەر ادام ءولتىرىپ جاتقان جاعداي بولسا، نە بولۋشى ەدى»، – دەدى كوكتال اۋىلىنىڭ تۇرعىنى شىڭعىس يبرايەۆ.
اۋىل اكىمى بولسا قىلمىستىڭ كوبەيىپ كەتكەنىن ايتىپ، مامان تاپشىلىعىن العا تارتتى.
«بىزدە 12 ەلدىمەكەن بار. شتات بويىنشا 4 پوليسيا. ءقازىر 2 ادام قىزمەت ەتىپ جاتىر 12 اۋىلعا. ولاردا 1 ماشينا»، – دەدى قاينار اۋىلدىق وكرۋگىنىڭ اكىمى نۇربولات ماناپبايەۆ.
ال پوليسيا دەپارتامەنتى تۇرعىنداردىڭ سوزىمەن كەلىسپەيدى. ماسەلەن، جىل باسىنان بەرى تىركەلگەن بىرنەشە توناۋ فاكتىسىنىڭ بىرەۋى عانا اشىلعان ەكەن.
«تالعار اۋدانى كوكتال اۋىلىندا 2063 ادام تۇرادى. رەسمي مالىمەتتەرگە سايكەس، ەلدىمەكەندە بوتەننىڭ مۇلكىن توناۋ بويىنشا 6 ۇرلىق تىركەلگەن. وسى قىلمىستىق ىستەر بويىنشا كۇدىكتىلەردى انىقتاۋ ماقساتىندا ءبىرقاتار جەدەل ىزدەستىرۋ جۇمىستارى جۇرگىزىلىپ جاتر. قىلمىستىڭ كۋاگەرى پىسىقتالىپ، كۇدىكتىلەردىڭ كەتۋ جولدارى بويىنشا ورناتىلعان بەينەباقىلاۋ كامەرالارى تەكسەرىلىپ جاتىر»، – دەدى وبلىستىق پد رەسمي وكىلى ەرنار ءسايدىلدين.
ال شىدامى تاۋسىلعان اۋىل تۇرعىندارى ءتارتىپ ساقشىلارى بۇل جولى دا قىلمىستى اشا الماسا، ءوز اراسىنان كۇندەلىكتى حالىق جاساعىن شىعارىپ، ۇرىلاردىڭ جازاسىن ءوزىمىز بەرەمىز دەپ وتىر.