ۇكىمەتتىك كوميسسيا قۇرىلدى
ق ر پرەزيدەنتىنىڭ اباي، جەتىسۋ جانە ۇلىتاۋ وبلىستارىن قۇرۋدى كوزدەيتىن «ق ر اكىمشىلىك-اۋماقتىق قۇرىلىسىنىڭ كەيبىر ماسەلەلەرى تۋرالى» جارلىعىن ىسكە اسىرۋ جونىندەگى ءىس-شارالار جوسپارى بەكىتىلدى، دەپ حابارلايدى Almaty-akshamy.kz ۇكىمەتتىڭ رەسمي سايتىنا سىلتەمە جاساپ.
ءىس-شارالار جوسپارى مىناداي شارالاردى قامتيدى: جاڭا وبلىستاردىڭ شەكارالارىن بەلگىلەۋ؛ ورتالىق مەملەكەتتىك ورگانداردىڭ اۋماقتىق ورگاندارىن قۇرۋ؛ ورتالىق جانە جەرگىلىكتى اتقارۋشى ورگانداردىڭ شتات سانىنىڭ ليميتتەرىن بەكىتۋ؛ جاڭادان قۇرىلعان وبلىستار اراسىندا بيۋدجەت ءبولۋ بالانسىن قابىلداۋ؛ وبلىستاردى قۇرۋ شەڭبەرىندەگى شىعىستاردى رەسپۋبليكالىق بيۋدجەتتى قالىپتاستىرۋ مەن ناقتىلاۋ ءۇشىن قاراۋعا ەنگىزۋ جانە باسقالار كىرەدى. جوسپاردىڭ قابىلدانۋى جاڭادان قۇرىلعان جانە قايتا ۇيىمداستىرىلعان وبلىستاردا مەملەكەتتىك ورگانداردىڭ جۇمىس ىستەۋى ءۇشىن قاجەتتى ءىس-شارالاردىڭ جۇزەگە اسىرىلۋىن قامتاماسىز ەتۋگە مۇمكىندىك بەرەدى. جوبانى ىسكە اسىرۋ رەسپۋبليكالىق بيۋدجەتتەن قارجىلىق شىعىنداردى قاجەت ەتپەيدى. پرەمەر-مينيستردىڭ ءبىرىنشى ورىنباسارى رومان سكليار جاڭا وبلىس ورتالىقتارىندا ءبىرقاتار كوشپەلى كەڭەستەر وتكىزدى، ولاردىڭ بارىسىندا وڭىرلەردىڭ قاجەتتى اكىمشىلىك عيماراتتاردى ساتىپ الۋعا، جالعا الۋعا جانە جوندەۋ جۇرگىزۋگە دايىندىعى مەن قاجەتتىلىكتەرى باعالاندى. جالپى جۇرگىزىلگەن تالداۋ جۇمىستارى جاڭا وبلىس ورتالىقتارىندا مەملەكەتتىك ورگاندار مەن قىزمەتكەرلەردى ورنالاستىرۋ جانە ولاردىڭ جۇمىس ىستەۋى ءۇشىن قاجەتتى اكىمشىلىك عيماراتتار دايىن ەكەنىن كورسەتتى. ەستەرىڭىزگە سالا كەتەيىك، بيىل 16 ناۋرىزدا مەملەكەت باسشىسى پارلامەنت پالاتالارىنىڭ بىرلەسكەن وتىرىسىندا قازاقستاندا ءۇش جاڭا وبلىس قۇرىلاتىنىن مالىمدەدى. مەملەكەت باسشىسىنىڭ تاپسىرماسىن ىسكە اسىرۋ اياسىندا ۇكىمەتتىك كوميسسيا قۇرىلدى، ول اۋداندىق جانە وبلىستىق ءماسليحاتتار دەڭگەيىندە جاريا تىڭداۋلار ۇيىمداستىرۋدى، تۇرعىنداردىڭ جەرگىلىكتى وكىلدى ورگاندارمەن كەزدەسۋلەرىن، سونداي-اق رەسپۋبليكالىق ونوماستيكالىق كوميسسيانىڭ وتىرىسى سەكىلدى اۋقىمدى جۇمىس جۇرگىزدى.