جابىق نىساننىڭ جالپى اۋماعى 450 شارشى مەتر
مەدەۋ مۇز ايدىنى كەشەنى ەندى قىسقى مەزگىلدە عانا ەمەس، جاز ماۋسىمىندا دا جۇمىس ىستەيدى. نىساننىڭ اشىلعانىنا 50 جىل تولۋىنا وراي مۇنداي مۇمكىندىك دەمالۋشىلارعا العاش رەت بەرىلىپ وتىر، دەپ حابارلايدى Almaty-akshamy.kz Almaty.tv-گە سىلتەمە جاساپ.
جابىق نىساننىڭ جالپى اۋماعى 450 شارشى مەتر. اۋماعى ۇلكەن بولماسا دا كەلۋشىلەر ەندى جاز مەزگىلىندە دە كونكي تەبۋگە مۇمكىندىك الادى. 1 ماۋسىم كۇنى جۇمىسىن باستاعان ورتالىق تامىز ايىنىڭ سوڭىنا دەيىن اشىق بولادى. ۇيىمداستىرۋشىلار شىلىڭگىر شىلدە مەن تامىلجىعان تامىز ايىندا دا دەمالۋعا كەلەتىندەردىڭ كوپ بولاتىنىنا سەنىمدى.
«ءبىز جازعى دەمالىسقا شىقتىق. قىستا ءبىز كەلىپ ۇلگەرمەپ ەدىك، ساباق بولدى. ەندى ءقازىر جاز كەزىندە دە اشىلعانىنا قۋانىشتىمىز»، – دەدى دەمالۋشى دانيال وتەگەن.
«ءبىز باتىس قازاقستان وبلىسى ورال قالاسىنان الماتىعا وتباسىمىزبەن دەمالۋعا كەلدىك. مەدەۋدە جازعى كەزدە كونكي تەپكەنىمىزگە قۋانىشتىمىز. كوڭىلدى دەمالىس بولىپ جاتىر»، – دەدى دەمالۋشى ماحاببات قىدىروۆا.
ۇيىمداستىرۋشىلار جاز مەزگىلىندە مۇزدى قاتىرۋ اسا كۇردەلى ەكەنىن ايتادى. ول ءۇشىن ءتۇرلى تەحنولوگيالارمەن جابدىقتالعان مۇزداتقىشتار ورناتىلعان.
«50 جىلدىق تاريحتا ءبىرىنشى رەت جاساپ وتىرمىز. بۇل – ۇلكەن ناتيجە. الداعى ۋاقىتتا جازعى كاتوكتىڭ اۋدانىن ۇلكەيتەمىز دەگەن ويىمىز بار. ويتكەنى ءقازىر تەحنولوگيالار دامىپ جاتىر»، – دەدى «مەدەۋ» مۇز ايدىنىنىڭ ديرەكتورى ابىلاي قوندىبايەۆ.
دەمالىس ورتالىعى ءۇزىلىسسىز تاڭعى ساعات 10:00-دەن كەشكى 10.00-گە دەيىن جۇمىس ىستەيدى. بيلەت باعاسى ەرەسەكتەرگە 1500، ال 14 جاسقا دەيىنگى بالالار ءۇشىن 1000 تەڭگە. كونكيلەردى جالعا الۋ قۇنى ولشەمىنە قاراي مىڭ تەڭگە مەن 2 مىڭنىڭ ارالىعىندا.