قونايەۆ قالالىق كوپسالالى اۋرۋحانا ماماندارى الماتى قالاسى، الماتى جانە جەتىسۋ وبلىستارى بويىنشا قاجد №12 مەكەمەسىندەگى سوتتالعانداردى مەديسينالىق تەكسەرۋدەن وتكىزدى.
جازاسىن وتەپ جاتقان ەر ازاماتتاردى تەكسەرۋدى تاجىريبەلى جانە بىلىكتى دارىگەر-ماماندار جۇزەگە اسىردى، دەپ حابارلايدى Almaty-akshamy.kz Polisia.kz-كە سىلتەمە جاساپ.
سونىمەن قاتار الماتى وبلىسىنىڭ دەنساۋلىق ساقتاۋ باسقارماسى جىلجىمالى دياگنوستيكالىق مەديسينالىق كەشەن ۇسىندى. وندا سوتتالعاندارعا ۋلترادىبىستىق زەرتتەۋلەر مەن كەۋدە قۋىسىنىڭ ورگاندارىن تەكسەرۋ جۇرگىزىلدى. تەكسەرۋ كەزىندە ولارعا ءارتۇرلى دياگنوزدار قويىلىپ، مەديسينالىق ۇسىنىستار تاعايىندالدى، ال كەيبىرەۋلەرى ءارى قاراي ءتيىستى جوسپارلى ەمدەۋ ءۇشىن ديسپانسەرلىك ەسەپكە الىندى.
«مۇنداي ءىس-شارالار اۋرۋلاردى ۋاقىتىلى انىقتاۋ جانە ولاردى ەمدەۋ بويىنشا جۇمىستى جەڭىلدەتەدى. بارلىعى 200-گە جۋىق سوتتالعان تەكسەرۋدەن ءوتتى. جازاسىن وتەۋشىلەردى مەديسينالىق تەكسەرۋ جۇمىستارى الداعى ۋاقىتتا دا جالعاسىن تاباتىن بولادى»، – دەپ اتاپ ءوتتى قاجد باستىعىنىڭ ورىنباسارى ەرلان ۇزاقوۆ.