ارۋلاپ جەرلەنىپ، ارداقتاپ كومىلمەگەندەر جەر بەتىنە قايتا شىقتى. 1،5 مەتر تەرەڭدىكتەن تابىلعان سۇيەكتەردىڭ بارلىعى رەپرەسسيا جىلدارىندا جازىقسىز وققا ۇشقاندارعا تيەسىلى. اۋماقتا تەك ادام سۇيەگى ەمەس، اتۋ جازاسىنا كەسىلگەندەردىڭ جەكە قۇرالدارى دا انىقتالىپ جاتقان كورىنەدى، دەپ حابارلايدى Almaty-akshamy.kz.
الماتى وبلىسىنا قاراستى جاڭالىق اۋىلىندا ادام سۇيەكتەرى بۇعان دەيىن دە بىرنەشە مارتە تابىلعان ەدى. كوبىنە سۋ تارتىپ، قۇبىر جۇرگىزگەندە شىعاتىن تاريحي ماتەريالدار بيىل ءبىرىنشى رەت قانا مەملەكەتتىك جوبا اياسىندا زەرتتەلىپ وتىر. ال 14 كۇننىڭ ىشىندە 15 شاقتى ادامنىڭ دەنەسى شىققان اۋىلدا ارحەولوگتار ءالى دە 4 مىڭنان اسا سۇيەك جاتۋى مۇمكىن، - دەپ جازدى Almaty.tv.
سۇيەكتەردەن بولەك، التىن ءتىس، تۇيمەلەر، كيىم مەن اياق كيىم بولىكتەرىن دە كوزبەن كورىپ، قولمەن ۇستادىق. تابىلعان جادىگەردىڭ كوبى جاقسى ساقتالىپتى. تەك ادام سۇيەكتەرى ءبىر كەزدە كوشەدە جۇرگىزىلگەن جوندەۋ جۇمىستارى كەزىندە بۇلىنگەندىكتەن، كوبىنە شاشىراپ كەتكەن.
بۇل باسىلىم بولىگى 1934-54 جىلدارى شىققان «ستالين جولى» گازەتىنە تيەسىلى ەكەن. ءقارىپ تانىپ، گازەت وقىعانىنا قاراپ، تاريحشىلار بۇل ماڭدا ءبىلىمدار ادامداردىڭ اتىلۋى مۇمكىن دەيدى. باسقا دەرەكتەر دە وسى بولجامعا اكەپ تىرەپ تۇر.
«كريميناليستىك، سوتتىق-انتروپولوگيالىق تالداۋ سەكىلدى عىلىمي جۇمىستاردى جۇزەگە اسىرادى. ال ءۇشىنشى كەزەڭدە وسى تابىلعان سۇيەك قالدىقتارىنا دنق ءاناليزىن جاساۋعا الماتىداعى گەنەتيكا ينستيتۋتى مەن ۆيلنيۋس قالاسىنداعى گەنەتيكا ينستيتۋتى اتسالىسادى»، – دەدى تاريح عىلىمدارىنىڭ دوكتورى، پروفەسسور دوسبول بايعۇناقوۆ.
تابىلعان ماتەريالداردىڭ ىشىندە ايەل ادامعا تيەسىلى زاتتار دا بار. ال دەنەلەردىڭ كوبى 1،5 مەتردەن-اق جەر بەتىنە شىعىپ جاتقان كورىنەدى. سوعان قاراعاندا، ادامداردى ارنايىلاپ جەرلەمەگەن، تەك اتقان سوڭ كومە سالعان دەگەن بولجام بار.