بۇل باعىتتاعى جۇمىس جالعاسۋدا.
الماتى وبلىسىندا پايدالانىلماي جاتقان 61 مىڭ گەكتار جەر مەملەكەت مەنشىگىنە قايتارىلدى. بۇل جونىندە ءوڭىر اكىمى قانات بوزىمبايەۆ ۇيعىر اۋدانى تۇرعىندارىمەن كەزدەسۋ بارىسىندا ايتتى، دەپ حابارلايدى Almaty-akshamy.kz.
الماتى وبلىسى اكىمىنىڭ باسپا ءسوز قىزمەتىنىڭ مالىمەتى بويىنشا، جەر ماسەلەسىمەن ارنايى وبلىستىق كوميسسيا اينالىسىپ جاتىر. ءقازىر ولار پانفيلوۆ اۋدانىندا جۇمىس ىستەۋدە.
وبلىس اكىمىنىڭ ايتۋىنشا، قابىلدانعان شارالاردىڭ ناتيجەسىندە جالپى 61 مىڭ گەكتار جەر مەملەكەت مەنشىگىنە قايتارىلدى، 167 مىڭ گەكتارعا قاتىستى ماتەريال قارالىپ جاتىر.
قانات بوزىمبايەۆپەن كەزدەسۋدە ۇيعىر اۋدانى تۇرعىندارىنىڭ باسىم بولىگى ەگىستىك، جايلىم جەرلەردىڭ جوقتىعىنا قاتىستى سۇراقتار قويدى.
«وبلىس اكىمى بولعالى بەرى 12 اۋدان مەن قالادا تۇرعىندارمەن كەزدەسۋ وتكىزدىم. وسى كەزدەسۋلەردە الەۋمەتتىك سيپاتتاعى 200-دەن استام پروبلەمالىق ماسەلە كوتەرىلدى. بۇل رەتتە ءاربىر اۋداندا پايدالانىلمايتىن جەر ۋچاسكەلەرى، جەكە مال جاياتىن جايىلىمنىڭ جوقتىعى تۋرالى ايتىلدى. سوڭعى جىلدارى ۇيعىر اۋدانىنىڭ تۇرعىندارى جايىلىمدىق جانە تۇرعىن ءۇي قۇرىلىسى ءۇشىن جەردىڭ جەتىسپەۋى، اۋىل شارۋاشىلىعى جەرلەرىن كونكۋرس بويىنشا الۋ، ءىرى شارۋاشىلىقتاردىڭ پايدالانۋسىز جەرلەرىن قايتارۋ ماسەلەلەرىن ءجيى كوتەرىپ ءجۇر. سۋارۋ جۇيەلەرىن جوندەۋدە اۋدان باسشىلىعىنىڭ ناقتى شارالار قابىلداماۋى دا نارازىلىق تۋدىرىپ وتىر»، - دەپ اتاپ وتكەن قانات بوزىمبايەۆ وسى ماسەلەلەرگە بايلانىستى اۋدان باسشىلىعىنا ءتيىستى تاپسىرمالار بەردى.