قىزمەت مەرزىمىن ۇزارتقىسى كەلەتىن اسكەري قىزمەتشىلەرگە زەينەتكە كەشىرەك شىعۋعا مۇمكىندىك بەرىلەدى.
قازاقستاندا اسكەري قىزمەتشىلەردىڭ زەينەت جاسى كوتەرىلمەيدى، دەپ حابارلايدى Almaty-akshamy.kz قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
بۇعان دەيىن زاڭعا ەنگىزىلگەن وزگەرىستەرگە بايلانىستى اسكەري قىزمەتشىلەردىڭ زەينەت جاسى بەس جىلعا كوتەرىلگەنى حابارلانعان بولاتىن. الايدا قورعانىس مينيسترلىگى مۇنى جوققا شىعاردى.
مينيسترلىك تۇسىندىرگەندەي، اسكەري قىزمەتشىلەرگە تاڭداۋ قۇقىعى بەرىلەدى. ەگەر تاجىريبەسى مول ءارى دەنساۋلىعى جارامدى اسكەري قىزمەتشى قىزمەت مەرزىمىن ۇزارتقىسى كەلسە، وندا ونىمەن بەس جىلعا جاڭا كەلىسىمشارت بەكىتىلەدى.
«2022 جىلعى 15 ساۋىردە «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭعا ەنگىزىلگەن وزگەرىستەرگە سايكەس، اسكەري قىزمەتتە بولۋدىڭ شەكتى جاسىنا جەتكەن، جوعارى كاسىبي دايىندىعى جانە اتقارىپ وتىرعان لاۋازىمىندا جۇمىس تاجىريبەسى بار، دەنساۋلىعى بويىنشا جارامدى اسكەري قىزمەتشىلەردىڭ قىزمەت مەرزىمى بەس جىلعا دەيىن جاڭا كەلىسىمشارت بەكىتۋ ارقىلى ۇزارتىلۋى مۇمكىن»، - دەپ ءتۇسىندىردى ۆەدومستۆو.
وسىلايشا اسكەري قىزمەت مەرزىمى ۇزارتىلعان جاعدايدا، اسكەري قىزمەتشى زەينەتكە بەلگىلەنگەن مەرزىمنەن كەش شىعا الادى.