47 كۇن بويى جانساقتاۋ بولىمىندە جاتقان ايەلدىڭ دەنساۋلىعى جاقساردى
الماتى وبلىسىنىڭ ىلە اۋدانىندا وكپەسىنىڭ 90 پايىزى زاقىمدانعان جۇكتى ايەل جازىلىپ شىقتى، دەپ حابارلايدى Almaty-akshamy.kz
الماتى وبلىستىق دەنساۋلىق ساقتاۋ باسقارماسى باسپا ءسوز قىزمەتىنىڭ مالىمەتىنشە، ەم-شارا ەكمو (ەكستراكورپورالدى مەمبرانالىق وكسيگەناسيا) اپپاراتىن پايدالانا وتىرىپ جۇزەگە اسىرىلدى. ىلە اۋداندىق ورتالىق اۋرۋحاناسىنا جۇكتى كەلىنشەك COVID-19 دياگنوزىمەن، وكپەسىنىڭ 90 پايىزى زاقىمدانعان كۇيىندە جەتكىزىلگەن بولاتىن. اتالعان اۋرحانا ديرەكتورى باۋىرجان ىسقاق ەربوزىم ۇلى ناۋقاس ەكمو اپپاراتىنىڭ كومەگىمەن امان قالعانىن ايتتى.
«9 تامىز كۇنى 27 جاستاعى جۇكتى ايەل (38-39 اپتا) وتە اۋىر جاعدايدا تۇسكەن بولاتىن. اۋىر حالدە تۇسكەن ايەلگە دەرەۋ وتا جاسالىپ، بالا امان-ەسەن دۇنيەگە كەلدى. ءبىراق ناۋقاستىڭ جاعدايى ناشارلاپ، قاندى وتتەگىمەن قانىقتىراتىن ەكمو اپپاراتىنا قوسۋعا تۋرا كەلدى. ناۋقاس 31 كۇننەن كەيىن وزدىگىنەن دەم الا باستادى»، - دەدى باۋىرجان ىسقاق.
4 بالانىڭ اناسى بايانسۇلۋ امانگەلدييەۆا جانساقتاۋ بولىمىندە مەديسينا قىزمەتكەرلەرىنىڭ كومەگىمەن قايتا اياققا تۇرىپ، وزدىگىنەن دەم الۋدى، قوزعالۋدى ۇيرەنگەنىن ايتادى.
«مەن جانساقتاۋ بولىمىندە 47 كۇن جاتتىم. ەكى اي بويى بالالارىمدى كورۋ ارمان بولدى. كوپشىلىك جينالعان جەردە ماسكا تاققان ەمەسپىن. بۇل مەنىڭ باستى قاتەلىگىم بولدى. ويتكەنى ماسكا تاققان كەزدە ءوزىمدى جايسىز سەزىنىپ، اۋا جەتپەي تۇرعانداي سەزىنەتىنمىن. الايدا ءبىر جۇتىم اۋانى وزدىگىمنەن جۇتا الماي قينالعاندا قاتتى وكىندىم. قاتەلىگىمنىڭ سالدارىنان وتباسىمدى، تۋعان-تۋىستارىمدى، مەنىڭ ءومىرىم ءۇشىن ەكى اي بويى كۇرەسكەن دارىگەرلەردى اۋرەگە سالدىم. ءقازىر امان-ەسەن جازىلىپ، وتباسىما ورالدىم. دارىگەرلەرگە العىسىم شەكسىز»،- دەدى بايانسۇلۋ امانگەلدييەۆا.
ايتا كەتەيىك، جۇقپالى دەرتكە شالدىققان تۇرعىن اۋرۋحانادا 58 كۇن جاتسا، سونىڭ 47 كۇنىن جانساقتاۋ بولىمشەسىندە وتكىزدى. ىلە اۋدانىق اۋرۋحاناسىنا ودان وزگە COVID-19 دياگنوزىمەن، وكپەسى 80 پايىزعا دەيىن قابىنعان بەس جۇكتى ايەلدى دارىگەرلەر امان الىپ قالدى.