الماتى وبلىسىندا جول اپاتىنان بەس ادام قازا تاپتى

كامەلەتكە تولماعان ءۇش بالا جاراقات العان.

الماتى وبلىسىندا ەكى كولىك سوقتىعىسىپ، بەس ادام قازا تاۋىپ، ءۇش كامەلەتكە تولماعان بالا زارداپ شەكتى، دەپ حابارلايدى Almaty-akshamy.kz Sputnik.kz-كە سىلتەمە جاساپ.

الەۋمەتتىك جەلىدە الماتى – شونجى تاسجولىندا جانتۇرشىگەرلىك جول اپاتى بولعان جەردە تۇسىرىلگەن ۆيدەو تاراپ كەتتى. جازبا اۆتورىنىڭ ايتۋىنشا، اپات كولىكتەردىڭ بەتپە-بەت سوقتىعىسۋى سالدارىنان بولعان.

الماتى وبلىستىق پوليسياسىنىڭ مالىمەتىنشە، 6 تامىز كۇنى كەشكى ساعات 20:40 شاماسىندا ەڭبەكشىقازاق اۋدانىندا Audi جانە Renault كولىكتەرى سوقتىعىسقان. Audi كولىگىنىڭ 22 جاستاعى جۇرگىزۋشىسى الماتى – كوكپەك – كوكتال اۆتوجولىمەن شىعىس باعىتتا كەلە جاتىپ، ءرولدى باسقارا الماي، جولدىڭ قارسى بەتىنە شىعىپ كەتكەن.

«وقيعا ورنىندا بەس ادام قازا تاپتى. ءتۇرلى دەنە جاراقاتىمەن ءۇش كامەلەتكە تولماعان بالا شەلەك اۋىلىنداعى اۋرۋحاناعا جاتقىزىلدى. وسى فاكتى بويىنشا ەڭبەكشىقازاق اۋداندىق پوليسيا ءبولىمى قازاقستان قىلمىستىق كودەكسىنىڭ 345-بابى 4-بولىگىمەن قىلمىستىق ءىس قوزعاپ، بارلىق قاجەتتى ساراپتامانى تاعايىندادى»، - دەپ حابارلادى وبلىستىق پوليسيانىڭ باسپا ءسوز قىزمەتى.