ولار ۇلتتىق ۇلان اكادەمياسىندا اسكەري انت بەردى.
قىرىق قازاقستاندىق تۇركيا مەن رەسەيدىڭ اسكەري جوعارى وقۋ ورىندارىنىڭ ستۋدەنتتەرى اتاندى، دەپ حابارلايدى Almaty-akshamy.kz.
«جىل سايىن ۇلتتىق ۇلان اكادەمياسىنا ءبىرىنشى كۋرس ستۋدەنتتەرىن قابىلداۋمەن قاتار، حالىقارالىق شارتتار مەن كەلىسىمدەرگە سايكەس، شەت ەلدەردىڭ اسكەري-وقۋ ورىندارىندا وقۋ ءۇشىن كۋرسانتتاردى قابىلداۋ جۇزەگە اسىرىلادى. اسكەري انت – بۇل قازاقستان رەسپۋبليكاسىنىڭ پرەزيدەنتى بەكىتكەن نورماتيۆتىك-قۇقىقتىق قۇجات، سالتاناتتى انت جانە وزگەرمەيتىن اسكەري ءراسىم. ءاربىر اسكەري قىزمەتشى ونى قابىلداپ، ورىنداۋ اسكەري قىزمەت وتكەرۋدىڭ ءمانى مەن ماقساتىن قۇرايتىن مىندەتتەردى وزىنە الادى»، - دەپ حابارلادى ۇلتتىق ۇلاندا.
ۇلتتىق ۇلان اكادەمياسى باستىعىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى نۇرباي بەكتۇرسىنوۆ كۋرسانتتارعا جىلى لەبىزىن ءبىلدىردى.
«سىزدەر وتاننان الىس جاقتا، بىرەۋلەرىڭىز 4، ال ەندى بىرەۋلەرىڭىز 5 جىل وقۋعا كەتىپ بارا جاتسىزدار. وسى جىلدار ىشىندە، ەلدە وقيتىن كۋرسانتتارعا قاراعاندا، سىزدەرگە ارتىلعان جۇكتىڭ سالماعى ەكى ەسە اۋىر بولادى. تۋىستارىڭىزدان، دوستارىڭىزدان جانە ءسىز ءۇشىن قىمبات ادامداردان وسىنشاما ۋاقىت الىستا بولۋ وڭاي ەمەس. ۋاقىت پەن قاشىقتىق شىن مانىندە سىزدەردىڭ كۇش سىناعىنا قانشالىقتى توتەپ بەرە الاتىندىعىڭىزدى كورسەتەدى. سىزگە ءوز وتانىڭىزدى رەسپۋبليكادان تىس جەردە كورسەتۋ مارتەبەسى بۇيىردى. ءسىزدىڭ وقۋىڭىز بەن مىنەز-قۇلقىڭىزدىڭ پريزماسى ارقىلى باسقا ەلدەردىڭ وكىلدەرى ءبىزدىڭ وتانىمىز بەن حالقىمىز تۋرالى تۇسىنىككە يە بولادى»، - دەپ ءسوزىن قورىتتى نۇرباي بەكتۇرسىنوۆ.