جاڭالىق اۋىلىنىڭ تۇرعىنى بۇگىن 11 جاسقا تولار ەدى
الماتى وبلىسىنىڭ جاڭالىق اۋىلىندا جەڭىل كولىك قاققان 11 جاستار بالانى مەرت بولدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
قايعىلى جاعداي كەشە ساعات 17:00 شاماسىندا بولعان. تاس جولدىڭ جۇرگىنشىلەر جولاعىمەن ۇيىنە قايتىپ كەلە جاتقان بالانى جەڭىل كولىك جۇرگىزۋشىسى قاعىپ كەتكەن. اۋىل تۇرعىندارىنىڭ ايتۋىنشا، بالا 200 مەترگە دەيىن ۇشىپ كەتىپتى. وقيعا كەزىندە مەكتەپ وقۋشىسى ءتىل تارتپاي كەتتى.
وقيعانىڭ قالاي بولعانى الەۋمەتتىك جەلىدە بەينە جاريالاندى. كادردان قوعامدىق كولىكتىڭ جۇرگىنشىلەر وتكەلى جانىندا تۇرعانىن انىق اڭعارۋعا بولادى. ەكىنشى جولاقتا كەلە جاتقان جەڭىل كولىك جۇرگىرىپ وتكەن بالانى بايقاماي، جوعارى جىلدامدىقپەن سوعىپ كەتەدى.
مارقۇم بولعان مانسۇر – ءۇيدىڭ تۇڭعىشى. ارتىنان ەرگەن 2 ءىنىسى بار. بۇگىن ونىڭ تۋعان كۇنى ەكەن. 11 جاسىن مەرەكەلەۋدىڭ ورىنىنا جاس وتباسى بالالارىنان قاپىدا ايىرىلىپ، ەتەگى جاسقا تولىپ وتىر.
«بۇلاردىڭ كوشىپ كەلگەنىنە ەكى جىلعا جۋىقتادى. مانسۇر وتە كەرەمەت جىگىت. مەنىڭ بالالارىمنىڭ دوسى. مانسۇردى قاققان جەردە مەنىڭ ەكى بالامدى قاققان. 2016 جىلدان بەرى بالالارىمدى جىلىنا ەكى رەت ەمدەتىپ كەلەمىن»، – دەدى كورشىسى ءاليا وتەجانوۆا.
وسىدان 2 اپتا بۇرىن ءدال وسى جولدا 15 جاستاعى بالانى كولىك قاعىپ كەتكەن. ول دا وقيعا ورنىندا كوز جۇمىپتى. باستى سەبەپ – جول بويىندا باعدارشام جوق، جارىق باعاناسى ىستەن شىققان. سول سەبەپتى جۇرگىزۋشىلەر جىلدامدىقتى باسەڭدەتپەيدى.
«اۋىلىمىزدا ءبىر-اق مەكتەپ بار. جولدىڭ شىعىس بولىگىندە. ءبىراق مىنا باتىس جاقتا كوپبالالى انالار كوپ تۇرادى. بالا-شاعا وسى جاقتان جولدان ءوتىپ مەكتەپكە كەلەدى. مىندەتتى تۇردە سەرگەك كەرەك، باعدارشام كەرەك»، – دەدى جاڭالىق اۋىلىنىڭ تۇرعىنى شىنار سۇلەيمەنوۆا.
اۋىل تۇرعىندارى جەرگىلىكتى اكىمدىككە جول بويىنا قاۋىپسىزدىك بەلگىلەرىن كۇشەيتۋدى تالاي جىلدان بەرى ايتقان. اۋىل اكىمدىگى بۇل تەك ءبىر باسقارمانىڭ شەشىمىمەن قابىلداناتىن شارۋا ەمەس دەپ ماسەلەنى سوزىپ كەلگەن كورىنەدى. ءقازىردىڭ وزىندە حالىق تالابىنىڭ ناقتى قاشان ورىندالاتىنىن ءدوپ باسىپ ايتا المادى.
«بۇل جەردە پروەكتىلەر بار، وبلىس تاراپىنان، ءبىزدىڭ تاراپتان جاسالاتىن جۇمىس بار. ۋاقىتىمەن ورىندالادى ول. قانشا ۋاقىت كەتەدى. ونى ايتا المايمىن. سەبەبى مەن تاپسىرىس بەرۋشى ەمەسپىن»، – دەدى قاينار اۋىلدىق وكرۋگىنىڭ اكىمى نۇربولات ماناپپايەۆ.
الماتى وبلىستىق پوليسيا دەپارتامەنتىنىڭ حابارلاۋىنشا، بالانى سوققان كۇدىكتى ۇستالىپ، قاماۋعا الىنعان. 24 جاستاعى جۇرگىزۋشىگە قاتىستى تەرگەۋ شارالارى باستالىپ كەتكەن.
«اتالعان دەرەك ق ر قىلمىستىق كودەكستىڭ 345-بابى، 3-تارماعى بويىنشا تىركەلدى. الدىن-الا تەرگەۋ ۇيىمداستىرىلىپ جىتىر. جۇرگىزۋشى قازىرگى تاڭدا ۋاقىتشا ۇستاۋ يزولياتورىنا قامالدى»، – دەدى وبلىستىق پوليسيا دەپارتامەنتىنىڭ انىقتاۋ باسقارماسىنىڭ باستىعى مەدەت ايازبايەۆ.
بۇگىن جاڭالىق اۋىلىنىڭ شىعىس بولىگىندە تۇراتىن 200 بالانى اتا-انالارى مەكتەپتكە جىبەرمەي قويىپتى. ولار جولعا قاۋىپسىزدىك بەلگىلەرىن قويىپ، ماسەلەنى ءبىر جاقتى شەشپەيىنشە بالالالارى ساباققا بارمايتىنىن جەتكىزدى. ال قاپىدا قازا بولعان بالا بۇگىن جەر قوينىنا تاپسىرىلدى.