الماتى وبلىسىندا ءىىم مەن ۇقك بىرلەسكەن ارنايى وپەراسياسى بارىسىندا ءىرى ەسىرتكى زەرتحاناسى جويىلدى.
ىشكى ىستەر مينيسترلىگى مەن ۇلتتىق قاۋىپسىزدىك كوميتەتى جۇرگىزگەن بىرلەسكەن ءىس-شارالار بارىسىندا الماتى وبلىسىندا ورنالاسقان جاسىرىن ەسىرتكى زەرتحاناسىنىڭ جۇمىسى توقتاتىلدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
7 قاڭتاردا ءىىم جانە ۇقك كۇشتەرىمەن اۋقىمدى سينتەتيكالىق ەسىرتكى ءوندىرىسىن جولعا قويعان كۇدىكتى ۇستالدى. انىقتالعان ەسىرتكى زەرتحاناسىن ءتىنتۋ بارىسىندا 30 كگ «مەفەدرون» پسيحوتروپتىق زاتى جانە ەسىرتكى وندىرۋگە ارنالعان ءبىر توننادان استام حيميالىق رەاكتيۆتەر تابىلىپ، تاركىلەندى.
ارنايى وپەراسيا ءساتتى جۇزەگە اسۋ ءۇشىن پروكۋراتۋرا ورگاندارىنىڭ كەلىسىمى بويىنشا جەدەل-ىزدەستىرۋ ءىس-شارالارى جۇرگىزىلدى. قازىرگى ۋاقىتتا سينتەتيكالىق ەسىرتكى وندىرىسىنە قاجەتتى جابدىقتاردى جەتكىزۋ ارنالارى جانە باسقا دا سىبايلاستاردى انىقتاۋ بويىنشا تەرگەۋ شارالارى جۇرگىزىلۋدە. اتالمىش فاكت بويىنشا قازاقستان رەسپۋبليكاسى قىلمىستىق كودەكسىنىڭ 297-بابىنىڭ 3-بولىگى بويىنشا سوتقا دەيىنگى تەرگەۋ باستالدى.