كۇن سايىن وبلىستا جۇزگە جۋىق نارەستە دۇنيەگە كەلەدى.
قازىرگى ۋاقىتتا وڭىردەگى جالپى حالىق سانى ءبىر جارىم ميلليون ادامنان استى. تۋۋ كورسەتكىشىنە انالاردى الەۋمەتتىك جاعىنان قولداۋ دا وڭ اسەر ەتىپ وتىر، دەپ حابارلايدى Almaty-akshamy.kz 24.kz-كە سىلتەمە جاساپ.
ميرا سادىقوۆا - كوپ بالالى انا. ءقازىر التىنشى بالاسىن كۇتىپ ءجۇر. وتباسىمەن ەكى بولمەلى پاتەردە تۇرادى. پرەزيدەنتتىڭ بالا كۇتىمىنە بەرىلەتىن الەۋمەتتىك جاردەمنىڭ جانە التى ايعا ۇزارتىلعانىن بىلەدى. مەرزىمىمەن بىرگە كولەمى دە ارتسا دەگەن ۇمىتتە.
«ءبىر جاسقا دەيىن الاتىنبىز. ۇلعايتىپتى. ول كومەك قوي كادىمگىدەي بالاعا. مەملەكەت تاراپىنان كوپ بالالى انا رەتىندە ءار بالاعا ون سەگىز جاسقا دەيىن جاردەماقى الامىن»، - دەدى قالا تۇرعىنى ميرا سادىقوۆا.
وبلىستىق جۇمىسپەن قامتۋ باسقارماسىنىڭ مالىمەتىنشە، وڭىردە 44 مىڭنان استام انا بالا كۇتىمىنە بەرىلەتىن مەملەكەتتىك جاردەماقى الادى.
«جاردەماقىنى تولەۋ مەرزىمى كوبەيتىلىپ وتىر جانە بۇرىن مۇنداي كەزدە جۇمىسقا ادام شىعىپ كەتسە ءبىر جىلدان كەيىن جاردەماقىسى توقتاتىلاتىن. 23 جىلدىڭ ءبىرىنشى قاڭتارىنان باستاپ جۇمىس ىستەسە دە، ىستەمەسە دە، جاردەماقىسىن الىپ وتىرادى»، - دەيدى وبلىستىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى ايگۇل احمەتوۆا.
جىل باسىنان بەرى الماتى وبلىسىندا جيىرما مىڭ نارەستە دۇنيەگە كەلگەن. بۇل رەسپۋبليكا بويىنشا جوعارعى كورسەتكىش سانالادى. سول سەبەپتى قونايەۆ قالاسىندا پەريناتالدىق ورتالىق سالۋ قاجەت. ال قالالىق كوپسالالى اۋرۋحانانىڭ پەرزەنتحاناسىندا كۇن سايىن ون بالا تۋىلادى. ەگىز بوسانىپ جاتقان انالار دا بار. ولارعا بىلىكتى اكۋشەر ماماندار جان جاقتى كومەگىن كورسەتىپ جاتىر.
زاماناۋي مەديسينالىق قۇرالدارمەن جابدىقتالعان پەرزەنتحانانى قاراساي اۋدانىندا دا سالۋ جوسپارلانىپ وتىر. وتكەن جىلى اۋداندا سەگىز مىڭ بالا دۇنيە ەسىگىن اشتى.