الماتى وبلىسىنىڭ پوليسەيلەرى ىلە اۋدانى اۋماعىندا ءىرى كولەمدەگى ەسىرتكى جاسايتىن زەرتحانانى انىقتاپ، جولىن كەستى. بۇل تۋرالى ىشكى ىستەر مينيسترلىگىنىڭ وكىلى شۇعىلا تۇرلىبەك ءمالىم ەتتى، دەپ حابارلايدى Almaty-akshamy.kz.
«الماتى وبلىسىندا پوليسەيلەر ەسىرتكىنىڭ اۋقىمدى ءوندىرىسىن توقتاتتى. اتاپ ايتقاندا، ىلە اۋدانىنىڭ ەسىرتكى قىلمىسىنا قارسى ءىس-قيمىل دەپارتامەنتى قىزمەتكەرلەرى الماتى وبلىسىنداعى ارىپتەستەرىمەن بىرلەسىپ ەسىرتكى زەرتحاناسىن قۇرماق بولعانداردىڭ جولىن كەستى. مەجرەچەنسك كەنتى ماڭىنداعى قۇرىلىس پوليسەيلەردىڭ نازارىن اۋداردى. انىقتالعانداي، بەلگىسىز بىرەۋلەر 1 گەكتار جەردى تاسپەن قورشاپ، اۋىل شارۋاشىلىعىنا قاتىسى جوق جابدىقتار اكەلىپ، ترانسفورماتوردى ەلەكتر جەلىسىنە قوسقان. 20 كانيستردى پرەكۋرسورلارمەن تاسىمالداۋ كەزىندە پوليسەيلەر ەكى جەرگىلىكتى تۇرعىندى ۇستادى»، - دەدى شۇعىلا تۇرلىبەك ۆەدومستۆودا ونلاين وتكەن باسپا ءسوز ءماسليحاتىندا.
ۇستالعانداردان پسيحيكالىق بەلسەندى زاتتار تابىلعان.
«اتالعان قۇرىلىس الاڭى بۇرىن فەرما بولعان، كەيىن كۇدىكتىلەردىڭ ءبىرى ونى 18 ملن تەڭگەگە ساتىپ العان. ۋچاسكەنى بيىك ەتىپ قورشاپ، كوزدەن تاسالاعان جانە ۋاقىتشا باسپانا، مونشا مەن گاراج سالعان. كۇدىكتىلەر سىرت كوزدى الداۋ ءۇشىن مال ۇستايتىن ورىنداردى دا قاراستىرعان. ال ەسىرتكى جاساپ شىعارۋعا ارنالعان بولەك بولمە بار بولىپ شىقتى. ەسكىرتكى زەرتحاناسىنىڭ ءىشى تولىق جابدىقتالعان»، - دەيدى ول.
ونىڭ ايتۋىنشا، كۇدىكتىلەردەن ەسىرتكى وندىرۋگە ارنالعان جابدىقتار مەن 1000 ليتردەن استام پرەكۋرسور تاركىلەندى. سونداي-اق، اتالعان جايت بويىنشا قىلمىستىق ءىس قوزعالدى.