ءازىربايجان پرەزيدەنتى كولىك-لوگيستيكا سالاسىنىڭ ەكىجاقتى ىنتىماقتاستىقتاعى نەگىزگى باعىتتاردىڭ ءبىرى ەكەنىنە نازار اۋداردى
ءازىربايجان رەسپۋبليكاسىنىڭ پرەزيدەنتى يلحام الييەۆ قازاقستاننىڭ ءازىربايجانداعى جاڭادان تاعايىندالعان ەلشىسى ءالىم بايەلدىڭ سەنىم گراموتالارىن قابىلدادى، دەپ حابارلايدى Almaty-akshamy.kz.
قازاقستاندىق ديپلومات باۋىرلاس ءازىربايجان رەسپۋبليكاسىندا ەلىنىڭ اتىنان قىزمەت اتقارۋ ءوزى ءۇشىن ۇلكەن مارتەبە ەكەنىن اتاپ ءوتتى. ءا. بايەل قازاقستان مەن ءازىربايجان مەملەكەت باسشىلارىنىڭ تاپسىرمالارى شەڭبەرىندە ەكىجاقتى ىنتىماقتاستىقتى ودان ءارى ىلگەرىلەتۋ بويىنشا جۇمىس ىستەيتىنىن ايتتى.
سۇحبات بارىسىندا ءازىربايجان پرەزيدەنتى ي. الييەۆ ەكى ەل اراسىنداعى ىنتىماقتاستىق دەڭگەيىنىڭ قارقىنىنا كوڭىلىنىڭ تولىپ وتىرعانىن ايتا كەلە، ءوزىنىڭ قازاقستانعا جاساعان ساپارى مەن قازاقستان پرەزيدەنتىنىڭ ءازىربايجانعا جاساعان ساپارىنىڭ ىقپالداستىقتىڭ كەڭەيۋىنە ۇلكەن سەرپىن بەرگەنىن اتاپ ءوتتى. ءازىربايجان باسشىسى ءوزى مەن پرەزيدەنت قاسىم-جومارت توقايەۆ اراسىنداعى سەنىمگە نەگىزدەلگەن قارىم-قاتىناستىڭ ءقازاق-ازىربايجان باۋىرلاستىق بايلانىستارىن ودان ءارى نىعايتۋدىڭ كەپىلى ەكەندىگىن تىلگە تيەك ەتتى.
ءازىربايجان پرەزيدەنتى كولىك-لوگيستيكا سالاسىنىڭ ەكىجاقتى ىنتىماقتاستىقتاعى نەگىزگى باعىتتاردىڭ ءبىرى ەكەنىنە نازار اۋداردى. پرەزيدەنت ي. الييەۆ بۇگىندە جۇزەگە اسىرىلىپ جاتقان بىرلەسكەن ينفراقۇرىلىمدىق جوبالار جۇك تاسىمالى كولەمىن كەڭەيتۋگە جاقسى مۇمكىندىك بەرەتىنىن اتاپ ءوتتى. ي. الييەۆ سونداي-اق قازاق مۇنايىنىڭ ءازىربايجان ارقىلى جۋىردا باستالعان تاسىمالىنىڭ وتە ماڭىزدى قادام بولعانىن تىلگە تيەك ەتتى. پرەزيدەنت الييەۆ ەلشىنىڭ قىزمەتىنە تابىس تىلەدى.
ءوز كەزەگىندە ءا. بايەل ءازىربايجان پرەزيدەنتىن جانە حالقىن تاۋەلسىزدىك كۇنىمەن قۇتتىقتاپ، بيىل 100 جىلدىق مەرەيتويى كەڭىنەن اتالىپ جاتقان گەيدار الييەۆتى قۇرمەتپەن ەسكە الدى.
ديپلومات ساۋدا-ەكونوميكالىق ىنتىماقتاستىقتى دامىتۋ، سونداي-اق ەلدەرىمىزبەن قاتار، بۇكىل ءوڭىر ءۇشىن ۇلكەن گەوەكونوميكالىق ماڭىزى بار جوبالاردى جۇزەگە اسىرۋدىڭ ەكىجاقتى ىنتىماقتاستىقتاعى باسىمدىق ەكەندىگىمەن كەلىستى. اتالعان جوبالاردىڭ قاتارىندا ترانسكاسپيي حالىقارالىق كولىك باعىتىن دامىتۋ، كاسپيي تەڭىزىنىڭ تۇبىمەن فيبەر-وپتيكالىق بايلانىس جەلىسىن تارتۋ، قازاق مۇنايىنىڭ ەكسپورتىن ءارتاراپتاندىرۋ بار.
كەزدەسۋدە سونداي-اق قازاقستان مەن ءازىربايجاننىڭ حالىقارالىق ارەنادا، ونىڭ ىشىندە تۇركى مەملەكەتتەرى ۇيىمى اياسىندا جەمىستى ىنتىماقتاستىق جۇرگىزىپ وتىرعانى اتالىپ ءوتتى. بيىل قازاقستاندا وتەتىن تمۇ-نىڭ 10-شى مەرەيتويلىق سامميتىنە دايىندىق بارىسى تالقىلاندى.