يندونەزيادا وتكەن ينفورماتيكادان حالىقارالىق وليمپيادادا (IOI) قازاقستاندىق وقۋشىلار 2 كۇمىس جانە 2 قولا مەدال جەڭىپ الدى.
بۇل تۋرالى وقۋ-اعارتۋ ءمينيسترى اسحات ايماعامبەتوۆ ءوزىنىڭ الەۋمەتتىك جەلىسىندەگى پاراقشاسىندا ايتتى، دەپ حابارلايدى Almaty-akshamy.kz Elorda.info-عا سىلتەمە جاساپ.
«بۇل بەدەلدى وليمپياداعا ءبىزدىڭ 4 وقۋشى قاتىستى. 90-عا جۋىق ەلدەن كەلگەن 350-دەن استام قاتىسۋشىنىڭ باسىن قوسقان جارىستا 4 وقۋشىمىز دا جۇلدەلى ورىندارعا يە بولدى. ورالدىق جامبىل ماقسوتوۆ پەن سەمەيلىك مۇحامماداريف ساحمولدين كۇمىس، ال الماتىلىق ۆان لي مەن تايماس قورعانبايەۆ قولا جۇلدەنى يەلەندى. وقۋشىلارىمىزدى جاڭا جوعارى ناتيجەلەرىمەن جانە لايىقتى ماراپاتتارىمەن قۇتتىقتايمىن. اتا-انالارىنا قولداۋ كورسەتكەندەرى ءۇشىن، پەداگوگتەرگە ەڭبەكتەرى مەن كاسىبي شەبەرلىكتەرى ءۇشىن العىس ايتامىن»، - دەدى مينيستر.
ءمينيستردىڭ ايتۋىنشا، قازاقستاندىق وقۋشىلاردىڭ 2022 جىلى ەڭ بەدەلدى حالىقارالىق وليمپيادالاردا جەڭىپ العان مەدالدارىنىڭ سانى رەكوردتىق كورسەتكىشكە جەتتى.
ايتا كەتەيىك، قازاقستان قۇراماسىنىڭ قورجىنىندا 27 مەدال بار، ونىڭ ىشىندە 3 التىن، 15 كۇمىس جانە 9 قولا.
بيىل العاش رەت پرەزيدەنتتىڭ قولداۋىنىڭ ارقاسىندا حالىقارالىق جارىستاردىڭ جەڭىمپازدارى 4،5 ملن تەڭگەگە دەيىن قوماقتى اقشالاي سىياقى مەن ۇبت تاپسىرماي-اق جوو-دا وقۋعا گرانتقا يە بولادى.