مەكتەپتە 2 083 وقۋشى وقيدى جانە 219 ءمۇعالىم ساباق بەرەدى
الماتى وبلىسىندا العاشقى اۋىلدىق تىرەك مەكتەبى پايدا بولدى، دەپ حابارلايدى Almaty-akshamy.kz «قازاقستان حالقىنا» قوعامدىق قورىنىڭ باسپا ءسوز قىزمەتىنە سىلتەمە جاساپ.
ۇزىنعاش اۋىلىندا ورنالاسقان ت. رىسقۇلوۆ اتىنداعى مەكتەپتىڭ ماتەريالدىق-تەحنيكالىق بازاسى تولىق جاڭارىپ، زاماناۋي ءبىلىم بەرۋ تەحنولوگيالارى ەنگىزىلدى. مەكتەپ ءۇش اۋىسىمدى، وندا 2 083 وقۋشى وقيدى جانە 219 ءمۇعالىم ساباق بەرەدى. نزم ستاندارتى بويىنشا 37 وقۋ كابينەتى مەن شەبەرحاناسى، سونداي-اق STEM زەرتحانا، ارت ستۋديا، ينتەللەكتۋالدىق حولل، كىتاپحانا جانە تەلەستۋديا جابدىقتالدى.
«ءبىلىم تۋرالى» زاڭدا «تىرەك مەكتەپتەر» دەگەن ۇعىم بار، ولار ءوز كەزەگىندە قۇزىرەتتىلىك ورتالىقتارى بولۋى كەرەك جانە باسقا مەكتەپتەردە، اسىرەسە از قامتىلعان مەكتەپتەردە وقىتۋ ساپاسىن ارتتىرۋعا ىقپال ەتۋى قاجەت. وسى جاعدايدى تالداعان كەزدە اۋىل مەكتەپتەرىن دامىتۋ بويىنشا بىردە-بىر كەشەندى باعدارلاما بولمادى. سونداي-اق، PISA حالىقارالىق رەيتينگىنە سايكەس قازاقستاندا اۋىلداعى ءبىلىم دەڭگەيى تومەن. سوندىقتان، سەرىكتەستەرىمىز – بتدق جانە نزم-مەن بىرلەسىپ، ءبىز اۋىل جانە قالا مەكتەپتەرى اراسىنداعى الشاقتىقتى ازايتۋ ءۇشىن باعدارلامانى ازىرلەپ، وقۋ ورىندارىن جابدىقتاۋدى، جاڭا ستاندارتتار بويىنشا وقىتۋدى باستادىق. وتكەن جىلدان باستاپ 17 تىرەك مەكتەپتى قۇرعان بولساق، ەندى اۋداندار مەن مونوقالالاردا ءبىلىم بەرۋ ترانسفەرتىن كەڭەيتىپ، تاعى 53 تىرەك اۋىلدىق مەكتەپ قۇرعىمىز كەلەدى»، - دەپ اتاپ ءوتتى «قازاقستان حالقىنا» قوعامدىق قورىنىڭ باسقارما ءتوراعاسى بولات جامىشيەۆ.
ءبىلىم بەرۋدى تۇراقتى دامىتۋ قورى نزم-مەن بىرلەسىپ مەكتەپتەگى ءبىلىم بەرۋ ورتاسى مەن وقىتۋ ساپاسىنا تالداۋ جۇرگىزدى، سونداي-اق مەكتەپتى دامىتۋ، ءبىلىم بەرۋ ساپاسىن ارتتىرۋ بويىنشا ۇسىنىمدار ازىرلەدى، مۇعالىمدەرگە قاجەتتى بىلىكتىلىكتى ارتتىرۋ كۋرستارىن انىقتادى. ءپان مۇعالىمدەرى رەسپۋبليكالىق ءبىلىم بەرۋ باعدارلامالارى ورتالىعى جاتتىقتىرۋشىلارىنىڭ ەكى كۇندىك كۋرستارىنان جانە قارقىندى وقىتۋ باعدارلاماسىنان ءوتتى.
ايتا كەتسەك، «اۋىلدىق جەرلەردە تىرەك مەكتەپتەردىڭ الەۋەتىن دامىتۋ» باعدارلاماسى بويىنشا «قازاقستان حالقىنا» قورى 17 اۋىلدىق تىرەك مەكتەپتى قۇردى. جوبانىڭ بيۋدجەتى – 4 ملرد 250 ملن تەڭگە (1 مەكتەپكە شامامەن 250 ملن تەڭگە).