الماتى وبلىسىندا الاياق ايەلدىڭ ءىسى اشكەرە بولدى

WhatsApp جەلىسىندە حات الماسىپ وتىرعان قۇرباندارىن اقشا اۋدارۋعا كوندىرگەن الاياق ايەل ۇستالدى.

وسى جىلدىڭ قازان، قاراشا ايلارىندا الماتى، قىزىلوردا قالالارى مەن شىعىس قازاقستان، الماتى وبلىستارىندا تۇراتىن جەتى ازامات ينتەرنەتتەگى الاياقتىق دەرەكتەرى تۋرالى تالعار اپب كەزەكشى بولىمىنە ارىزدانعان بولاتىن، دەپ حابارلايدى Almaty-akshamy.kz Polisia.kz-كە سىلتەمە جاساپ. 

جابىرلەنۋشىلەردىڭ ارىزىنا سۇيەنسەك، WhatsApp مەسسەندجەرىندە بولاشاق قۇرباندار قوسىلعان ارنايى توپ قۇرىلعان. حات الماسۋ ارقىلى ولار اقشا تابۋدىڭ وسى جولىنا اقشا سالۋعا ادامداردى كوندىرگەن. قاجەتتى سوما اۋدارىلعاننان كەيىن فاريدا ەسىمدى ايەل “ءىزىن سۋىتقان”. قولدى بولعان اقشانىڭ جالپى سوماسى انىقتالۋدا. اتالعان دەرەكتەر ق ر قك-نىڭ 190-بابى 2-بولىگىنىڭ 4-تارماعى بويىنشا تالعار اپب -دە تىركەلدى جانە تەرگەۋ بارىسىندا ولاردىڭ بارلىعى ءبىر وندىرىسكە بىرىكتىرىلدى.

جۇرگىزىلگەن جەدەل ىزدەستىرۋ ءىس-شارالارىنىڭ ناتيجەسىندە پوليسيا قىزمەتكەرلەرى تالعار اۋدانى قىزىلتۋ كەنتىنىڭ 32 جاستاعى تۇرعىنىن انىقتاپ، ۇستادى. ول ۇسىنىلعان دالەلدەمەلەردەن كەيىن بارلىق ەپيزودتار بويىنشا ءوز كىناسىن تولىعىمەن مويىندادى. قازىرگى تاڭدا سوتقا دەيىنگى تەرگەۋ امالدارى جۇرگىزىلۋدە. وزگە اقپارات، ق ر قىجك-نىڭ 201-بابىنا سايكەس، تەرگەۋ مۇددەسىنە ساي جاريا ەتىلمەيدى.