قوقىس پوليگوندارىنىڭ باسىم بولىگى الماتىعا جاقىن اۋدانداردا انىقتالدى.
جەر سەرىگىنەن تۇسىرىلگەن سۋرەتتەر ارنايى باعدارلاماعا جۇكتەلىپ، جاڭارتىلىپ وتىرادى. تەك تالدىقورعان قالاسى ماڭىنان 40-تان استام وسىنداي زاڭسىز پوليگون تابىلعان، دەپ حابارلايدى Almaty-akshamy.kz Qazaqstan.tv سايتىنا سىلتەمە جاساپ.
مۇنى ماماندار ەشقايدا شىقپاي-اق، جەر سەرىگىمەن تۇسىرىلگەن سۋرەتتەردەن قاراپ ءبىلىپ وتىرادى. بيىلدىڭ وزىندە 389 نۇكتە تابىلىپ، 59 لاۋازىمدى تۇلعاعا 4 ملن تەڭگەدەن استام ايىپپۇل سالىندى.
"عارىشتىق تۇسىرىلىمدەر اعىمداعى جىلدىڭ قاراشا ايىنا دەيىن جالعاساتىندىقتان زاڭسىز قوقىس ورىندارىنىڭ سانى ءالى دە كوبەيۋى مۇمكىن. وسىعان سايكەس قازىرگى تاڭدا دەپارتامەنتپەن ءتيىستى شارالار قابىلدانۋدا"، - دەدى الماتى وبلىستىق ەكولوگيا دەپارتامەنتىنىڭ باس مامانى دانيار ومىربەكوۆ.
تالدىقورعاندا دا جاعداي ءماز ەمەس. 40 زاڭسىز پوليگون انىقتالدى. قوقىستى ارنايى ورىنعا توگۋگە ەرىنگەن تۇرعىندار مەن كاسىپورىندار تۇنگى ۋاقىتتى پايدالانىپ، قالدىقتاردى تاۋ قىلىپ ءۇيىپ كەتەدى.
حالىق قوقىستى توگەدى. ونى جيناۋ ءۇشىن قالا اكىمدىگى بيۋدجەتتەن قارجى بولەدى. جىلدا قايتالاناتىن جاعداي. جەرگىلىكتى بيلىك قار ەرىپ، قايتا قار جاۋعانشا وسىنداي جابايىلىقپەن الىسىپ كەلەدى.
"بيىلعى جىلى 15 ملن تەڭگە بولىنگەن. ءبىراق كونكۋرس بويىنشا 8،5 ملن تەڭگەگە كەلىسىمشارت جاسالعان. قازىرگى تاڭدا 1400 توننا قوقىس شىعارىلعان"، - دەدى قالالىق تۇكش ءبولىمىنىڭ باس مامانى راميل راحىمبايەۆ.
"قالا حالقىنىڭ جاۋاپكەرشىلىگى ويانباي مۇنداي جاعداي جىلدا قايتالانا بەرەدى"، - دەيدى سالا ماماندارى. ول ءۇشىن ءتيىستى زاڭداردى دا قاتاڭداتۋ قاجەت دەگەن پىكىردە.