جاڭارتىلاتىن ەنەرگيا كوزدەرىن دامىتۋ قاجەت
ق ر پرەمەر-مينيسترى ءاليحان سمايىلوۆ جاڭادان تاعايىندالعان ەنەرگەتيكا ءمينيسترى الماسادام ساتقالييەۆتى ۆەدومستۆو ۇجىمىنا تانىستىرىپ، الداعى كەزەڭگە ارنالعان ەنەرگەتيكا سالاسىنداعى باسىم مىندەتتەردى بەلگىلەدى، دەپ حابارلايدى Almaty-akshamy.kz.
ۇكىمەت باسشىسى ەنەرگەتيكا مينيسترلىگىنىڭ ءىرى مۇناي-گاز جوبالارى مەن ەكسپورتتىق كولىك دالىزدەرىن دامىتۋ جۇمىستارىن كۇشەيتۋ، گازدى قايتا وڭدەۋدى ۇلعايتۋ جونىندە شارالار قابىلداۋ، جىلۋ جانە ەلەكتر ەنەرگياسىن ءوندىرۋ سەكتورىن نىعايتۋ، سونداي-اق جاڭارتىلاتىن ەنەرگيا كوزدەرىن دامىتۋدى جالعاستىرۋى قاجەتتىگىن اتاپ ءوتتى.
«سوڭعى كەزدە كوپ جىلدار بويى قوردالانىپ كەلگەن كەيبىر ماسەلەلەردىڭ بەتى اشىلۋدا. ديزەل وتىنىنىڭ جەتىسپەۋشىلىگى، ەلەكترمەن جانە گازبەن جابدىقتاۋداعى اقاۋلار، جىلۋمەن جابدىقتاۋ وبەكتىلەرىندەگى اپاتتار – وسىنىڭ ءبارى ەنەرگەتيكا سالاسىندا ەلەۋلى پروبلەمالاردىڭ بار ەكەنىن كورسەتىپ وتىر. ولاردىڭ بارلىعى جەدەل تۇردە شەشىلۋى كەرەك»، – دەدى ءاليحان سمايىلوۆ.
وسى ورايدا ۇكىمەت باسشىسى مينيسترلىكتىڭ باستى مىندەتتەرىنىڭ ءبىرى ىشكى نارىقتى مۇناي ونىمدەرىمەن تولىقتىرۋ ەكەنىن، وسىعان بايلانىستى ولاردىڭ ءوندىرىسى مەن اينالىمىن قاتاڭ باقىلاۋدا ۇستاۋ قاجەتتىگىن اتاپ ءوتتى.
«مينيسترلىكتىڭ الدىندا كوپتەگەن كۇردەلى ماسەلە تۇر، ولاردىڭ ءتيىمدى شەشىلۋى وتىن-ەنەرگەتيكا سالاسىنا عانا ەمەس، بۇكىل ەكونوميكامىزدىڭ بولاشاعىنا تىكەلەي اسەر ەتەدى. الماسادام مايدان ۇلى ءوزىنىڭ ءبىلىمى مەن تاجىريبەسىن ەنەرگەتيكا سالاسىن دامىتۋعا جۇمسايتىنىنا سەنىمدىمىن. جالپى، ءبارىمىز مەملەكەت باسشىسىنىڭ ءتيىستى تاپسىرمالارىن بىرلەسىپ جانە ساپالى ورىنداۋىمىز كەرەك. جاڭا مينيسترگە جانە بۇكىل ۇجىمعا تابىستى جۇمىس تىلەيمىن»، — دەدى پرەمەر-مينيستر.