پايدالانۋعا بەرىلمەگەن ەكى نىسان بويىنشا ءقازىر سوت ءجۇرىپ جاتىر.
الماتى وبلىسىندا مەملەكەتتىڭ قىرۋار قاراجاتى جۇمسالعان قۇرىلىس نىساندارى اياقتالماعان كۇيى قالعان، دەپ حابارلايدى Almaty-akshamy.kz
ۇيعىر اۋدانى. ساۋىقتىرۋ كەشەنى
ۇيعىر اۋدانىنداعى ساۋىقتىرۋ كەشەنىنىڭ وزىنە وسىدان ءتورت جىل بۇرىن 1 ميلليارد تەڭگە بولىنگەن. ءبىراق ساۋىقتىرۋ ورتالىعىنىڭ قۇرىلىسى سول كۇيى اياقتالماي قالعان، ال قاڭقاسى ءۇش جىلدان بەرى قاڭىراپ تۇر.
«سىبايلاس جەمقورلىق تاۋەكەلدەرى كارتاسىن جۇزەگە اسىرۋ اياسىندا تاپسىرىلۋ مەرزىمى كەشىكتىرىلگەن، قارجى جىمقىرۋ ءقاۋپى بار الەۋمەتتىك نىساندار قۇرىلىسىنا مونيتورينگ جۇرگىزىلىپ جاتىر. ونىڭ ىشىندە 2 نىسان الماتى وبلىسىندا ورنالاسقان. بۇل – ۇيعىر اۋدانى شونجى اۋىلىنداعى دەنە شىنىقتىرۋ-ساۋىقتىرۋ كەشەنىنىڭ قۇرىلىسى جانە رايىمبەك اۋدانى جامبىل اۋىلىنداعى مادەنيەت ءۇيىنىڭ قۇرىلىسى»، - دەدى الماتى وبلىسىنىڭ جەمقورلىققا قارسى ەرىكتىسى كۋليارا مانەنوۆا.
رايىمبەك اۋدانى. مادەنيەت ءۇيىنىڭ قۇرىلىسى
جالپى ەلىمىزدىڭ بارلىق ءوڭىرى بويىنشا بيۋدجەتى 2،44 تريلليون تەڭگەنى قۇرايتىن، الايدا اياقتالماي شالا قالعان 156 نىسان بار ەكەنىن سىبايلاس جەمقورلىققا قارسى اگەنتتىكتىڭ قىزمەتكەرلەرى انىقتاعان.
«ساۋىقتىرۋ كەشەنىنىڭ قۇرىلىسىنا 2019 جىلى 1 ملرد تەڭگەدەن استام قاراجات ءبولىنىپ، تاپسىرۋ مەرزىمى 2021 جىلعى قاڭتارعا بەلگىلەندى. ال مادەنيەت ۇيىنە 2021 جىلى 474 ملن تەڭگەگە جۋىق قاراجات ءبولىنىپ، جۇمىستاردى اياقتاۋ مەرزىمى 2022 جىلدىڭ تامىز ايىنا قويىلدى. انتيكور ەرىكتىلەرمەن بىرلەسىپ وسى ەكى نىساندى ءجىتى باقىلاۋدا ۇستايدى»، - دەپ حابارلادى الماتى وبلىسىنىڭ سىبايلاس جەمقورلىققا قارسى قىزمەتى.