وليمپياداعا قاتىسۋشىلاردىڭ جۇلدە قورى 24 ميلليون تەڭگە جانە 4 پاتەر.
وليمپيادا جۇلدەگەرلەرىنە 3 بولمەلى پاتەر مەن اقشالاي سىياقى بەرىلدى، دەپ حابارلايدى aqshamnews.kz
پاريجدەگى وليمپياداعا قاتىسۋشىلاردى وبلىس اكىمى مارات سۇلتانعازييەۆ جەكە قۇتتىقتاپ، وبلىس كاسىپكەرلەرى اتىنان باعالى سىيلىقتار تابىس ەتتى.
"ايماق كاسىپكەرلەرى حالىقارالىق جارىستاردا تۋعان ءوڭىرىنىڭ نامىسىن قورعاپ جۇرگەن دارىندى سپورتشىلاردى قولداۋعا ءارقاشان دايىن. ءبىز سىزدەرمەن ماقتانامىز، سىزدەردىڭ مەدالدارىڭىز – بۇل جاي عانا سپورتتىق جۇلدەلەر ەمەس، ولار – باتىلدىقتىڭ، قايسارلىقتىڭ جانە وتانعا دەگەن شەكسىز سۇيىسپەنشىلىكتىڭ ناعىز ۇلگىسى"، -دەدى مارات سۇلتانعازييەۆ.
ءوڭىر باسشىسى الماتى وبلىسىنىڭ كاسىپكەرلەرى اتىنان وليمپيادانىڭ كۇمىس جۇلدەگەرى دەمەۋ جادىرايەۆقا 10 ميلليون تەڭگەنىڭ سەرتيفيكاتى مەن ءۇش بولمەلى پاتەردىڭ كىلتىن تابىس ەتتى.
قولا جۇلدەگەر نازىم قىزايبايعا دا 3 بولمەلى پاتەردىڭ كىلتى مەن 2 ميلليون تەڭگەنىڭ سەرتيفيكاتى تابىس ەتىلدى.
سپورتشىلاردىڭ جاتتىقتىرۋشىلارى دا جۇماقان تۇرعانبەكوۆ پەن بورانبەك قوڭىراتوۆ وڭىرلىك كاسىپكەرلەردەن 2 ميلليون تەڭگەنىڭ سەرتيفيكاتى مەن ەكى بولمەلى پاتەردىڭ كىلتىن الدى.
سونىمەن قاتار، الماتى وبلىسىنىڭ اكىمى پاريجدەگى وليمپيادا ويىندارىنا قاتىسۋشىلارعا كاسىپكەرلەر اتىنان 2 ميلليون تەڭگەنىڭ سەرتيفيكاتتارىن تابىس ەتتى:
ەدۋارد ەششەنكو (ستەند اتۋ)، قازاقستان رەسپۋبليكاسىنىڭ حالىقارالىق سپورت شەبەرى، ازيا ويىندارى مەن الەم كۋبوگىنىڭ جەڭىمپازى؛
اسەم ورىنباي (ستەند اتۋ)، قازاقستان رەسپۋبليكاسىنىڭ حالىقارالىق سپورت شەبەرى، ازيا ويىندارى مەن الەم كۋبوگىنىڭ جەڭىمپازى؛
ماريا دميتريەنكو (ستەند اتۋ)، قازاقستان رەسپۋبليكاسىنىڭ حالىقارالىق سپورت شەبەرى، قازاقستان رەسپۋبليكاسىنىڭ جانە حالىقارالىق تۋرنيرلەردىڭ بىرنەشە دۇركىن چەمپيونى، الەمنىڭ، ازيا كۋبوگىنىڭ جانە ازيا ويىندارىنىڭ ەكى دۇركىن قولا جۇلدەگەرى؛
نيكيتا چيريۋكين (اتۋ)، قازاقستان رەسپۋبليكاسىنىڭ حالىقارالىق سپورت شەبەرى، قازاقستان رەسپۋبليكاسىنىڭ جانە حالىقارالىق تۋرنيرلەردىڭ بىرنەشە دۇركىن چەمپيونى، الەم جانە ازيا چەمپيونى، الەم كۋبوگى مەن ازيا ويىندارىنىڭ قولا جۇلدەگەرى.